Dili – Iha enkontru ho formandos no formadór/a sira, loron 23 Novembru loraik, Kardeál João Braz de Aviz ko’alia kona ba ponto tolu: vida komunidade, formasaun no mudansa autoridade iha kreda nian iha Kreda.
Kona ba Vida Komunidade nia konvida kandidata no formadores sira hahu iha formasaun inisial presiza halo formasaun ba Vida komunidade, atu evita moris individualizmu maibe aprende atu moris ho ema seluk no ba ema seluk. Aspetu sira importante mak iha komunidade buka atu konese no hadomi ema hotu iha komunidade, no liu-liu koñese no hadomi ema ne’ebe tau matan ba o direitamente. Alen de ne’e Kardeál mos konvida kandidata sira atu observa didiak, vida orasaun, buka atu reza diak, fo importansia ba meditasaun, Adorasaun no se bele partesipa Eukaristia lor-loron. Aprende atu hatene husu no fo perdaun.
Kona ba formasaun D. Braz fo hanoin kona formasaun ne’ebe hahu wainhira ita sei iha ita nia inan nia knotak to’o ita mate. Nia mos husu atu iha formasaun tenki forma-an atu halo passajen husi spiritual individualizmu ba spiritual komunaun nian. Iha tempo formasaun hotu tenki aprende atu hatene Evanjelu no buat ne’ebe la’os Evanjelu, nune’e nei-neik tenki husi buat ne’ebe la’os Evanjellu .
Aspetu importante ida tan atu evita mos Psicóloga sira atu determina ema nia vokasaun, Psicologa nia knar mak atu fo tulun deit la’os eh labele determina ema ida nia vokasaun.
Nia sublinha tan virtude ida importante iha formasaun mak dosibilidade, tenki ser disponivel iha Maromak nia liman, hanesan badaen halo sana rai, hahu husi taho’o nia forma to’o sai vaso ida ne’ebe furak.
Kona ba formadores sira D. Braz dezafia formadores sira hodi dehan molok transmite prinsipiu ka valor ida, hanoin didiak katak buat ne’ebe atu hanorin ba ema seluk ne’e hau moris tuir ona. Sasin mak folin liu duke lia fuan sira. Maibe wainhira formadores hanorin akompana no ikus mai husu ba kandidata sira atu halo maibe kandidata sira la halo tuir dala ida to’o dala rua dala tolu la kohi halo sinais sira ne’ebe hatudu katak la iha vokasaun. Ikus mai nia fo laran metin ba sira katak maski sira hotu sei la sai relijioso maibe bele sai ema diak iha familia iha sosiedade.
Kona ba tópiku autoridade nia repete deit aspetu sira ne’ebe koalia ona ba relijioso sira.
(Alexandrina Pinto)
