Amu-Papa iha Angelus: Malignu kuda funu, Maromak kria dame

Castelgandolfo (Italia)-“Malignu [buat aat] buka nafatin estraga Maromak nia obra, hodi kuda divizaun iha ema sira-nia fuan, entre isin no klamar, entre ema ho Maromak, iha relasaun interpesoál, sosiál, internasionál, no mós entre ema no kriasaun: Amu-Papa ko’alia kona-ba  buat aat iha Angelus ohin nian. No esplika: “Malignu kuda funu; Maromak kria dame”. Maibé lalika ta’uk,  Bento XVI hakarak dehan, ne’ebé hodi hateke fali ba leitura sira liturjia ohin nian, hatudu katak “Maromak mak Bibi-Atan umanidade nian”, katak “Maromak hakarak ita hetan moris, hakarak lori ita ba du’ut matak, iha-ne’ebé ita bele hetan ai-han no deskansu; nia lakohi atu ita lakon no mate, maibé atu to’o iha ita-nia dalan nia rohan, katak plenitude moris nian”. Ho liafuan seluk, Maromak nia babesik la’ós oinseluk liu husi “buat ne’ebé aman ida no inan ida hakarak ba oan rasik: di’ak, ksolok, realizasaun”. Ba ne’e Bento XVI fó hanoin oinsá iha “Evanjellu Jezús aprezenta an nu’udar Bibi-Atan bibi sira ne’ebé lakon husi uma Israel nian. Ninia hateken mak hateken pastorál ida” .

No oinsá realiza buat ne’e hotu? “Jezús hola isin Maromak Bibi-Atan nian  liuhusi ninia modu haklaken nian no ninia obra sira – Amu-Papa dehan –, hodi tau matan ba moras sira no sala-na’in sira, ba sira ne’ebé «lakon»,  atu lori ba fatin seguru, iha Maromak nia laran-sadia”.

Ohni mós memória litúrjika “Madalena” Maria Magdala nian, nia mak entre «bibi sira ne’ebé lakon» ne’ebé Jezús salva”, hodi liberta nia husi “diabu hitu” no “husi moris atan totál ba malignu”.

“Isin-di’ak”, ne’ebé tuir Amu-Papa  “konsiste iha dame loos ida, kompletu, rezultadu rekonsiliasaun  ema nian iha an rasik no iha ninia relasaun hotu: ho Maromak, ho ema seluk, ho mundu”.

Hotu tiha orasaun mariana Amu-Papa fó hanoin “katak loron ruma tan sei hahú, iha Londres, edisaun Jogu Olímpiku edisaun XXX”.  “Jogu Olímpiku sira –  nia kontinua – mak eventu desportivu mundiál, iha ne’ebé atleta husi nasaun barak liu partisipa, nune’e iha valór simbóliku forte. Tanba ne’e Kreda Katólika hateke ba nia ho simpatia no atensaun partikulár. Ita reza atu, konforme Maromak nia hakaran, jogu sira iha Londres sai esperiénsia ida fraternidade nian entre povu hotu Rai nian”.