INSTITUTU “FIGLIE DI MARIA AUSILIATRICE (FMA)

Ami mak família relijioza ida moris husi S. João Bosco nia fuan no S. Maria Domenica Mazzarello nia fidelidade kriativa.  Don Bosco hili naran ida-ne’e tanba nia hakarak ami sai monumentu moris gratidaun nian ba Na’in-Feto. Iha Torino Don Bosco hetan konvite husi ema oioin; husi kontaktu ho instituisaun femininu oioin; husi nia devosaun kle’an ba Maria; husi Papa Pio IX nia konfirmasaun ne’ebé dudu nia atu ba oin; husi “mehi” no faktu estraordináriu sira ne’ebé nia rasik konta.

Tempu hanesan iha rai Mornese, foin-sa’e feto ida naran Maria Domenica Mazzarello anima grupu ida feto-raan sira nian ne’ebé dedika an ba labarik feto sira rai ne’ebá nian, ho finalidade atu hanorin sira profisaun ida, maibé liuliu atu gia sira iha vida sarani nian.
Nune’e, maski hela dook malu, mosu sinál rua ne’ebé ho sintonia haruka mensajen ida de’it: hahú obra edukasaun nian ba lafarik no foin-sa’e feto sira, ne’ebé iha Torino-Valdocco Don Bosco harii ona ba mane sira. Maria Domenica Mazzarello mak ko-fundadora ne’ebé fó vida, forma no baburas ba instituisaun foun ida-ne’e.
Iha loron 5 Agostu 1872 grupu dahuluk tenik sira nia “sin” hanesan Virjen Maria atu sai “tulun-na’in” liuliu ba foin-sa’e feto sira.

“Hodi Espíritu Santu nia kbiit no ho Maria nia intervensaun direta, S. João Bosco harii ita-nia Institutu nu’udar resposta salvasaun nian ba esperansa ne’ebé kle’an liu foin-sa’e feto sira nian. Don Bosco hakmanek nia ho rikusoin espirituál ne’ebé hetan inspirasaun husi Bibi-atan Di’ak nia karidade no mós tadak nia beran misionáriu ida maka’as” (Konst.1)

Ohin loron FMA sira konta provínsia relijioza 83 iha nasaun 93, iha kontinente lima ho totál komunidade lokál 1443.

Espiritualidade kongregasaun nian: karizma edukativu

Ami FMA, iha Kreda, mak FETO KONSAGRADA ne’ebé, hodi moris iha komunidade no hela iha ema sira nia leet esprime místika domin radikál ba Kristu. Iha simplisidade no ksolok ami saran moris iha servisu edukativu ba foin-sa’e sira. Ami haburas DEDIKASAUN MISIONÁRIA ne’ebé loke moris loroloron nian ba orizonte luan liután. Halo parte Kreda lokál, AMI ESPRIME SIDADANIA ATIVA iha territóriu no iha kultura ohin loron nian.
“Ami FMA, fiar katak ohin loron ami nia laran-manas misionáriu esprime liuhusi hilin konxiente edukasaun nian nu’udar dalan ba sidadania evanjélika. Ida ne’e husu prezensa no solidariedade ho foin-sa’e sira, kiak sira, no aten-brani atu serbí justisa no dame atu ema bele moris hamutuk hodi respeita ida-idak nia dignidade (Atu Kapítulu Jerál XXI).

Ho ótika prevensaun nian

“Ho domin preferensiál Don Bosco no Madre Mazzarello nian ami dedika an ba foin-sa’e sira ne’ebé kiak liu, katak sira ne’ebé tanba razaun oioin iha posibilidade uitoan de’it ba susesu no moris iha perigu laran.
Ba Don Bosco prevene katak eduka ema, favorese nia kapasidade atu fó sentidu ba moris liuhusi esperiénsia pozitiva, no moris iha koerénsia ho desizaun sira ne’ebé foti tiha ona.
Prevene katak kria relasaun edukativa ne’ebé iha kbiit atu estimula no fó apoiu ba kbiit interiór iha foin-sa’e sira no orienta nia ba etapa foun maturidade nian, ba esperiénsia foun, tuir perspetiva projetu moris sarani nian (Atu Kapítulu jerál XIX, p. 41)

Ami-nia estilu edukativu

Xave importante ida ne’ebé tradús no esplika tradisaun edukativa iha Institutu mak Maria Domenica Mazzarello nia moris. Maski nia la husik hela hakerek ruma kona-ba edukasaun, ita bele identifika ninia “knaar edukativu” liuhusi ninia moris rasik.
Kritériu ida importante liu ba nia mak prioridade ne’ebé nia fó ba ema: bainhira nia hakohak projetu ne’ebé Maromak hakarak ba nia, uluknanai nia hakarak lori foin-sa’e ida-idak atu iha enkontru moris nian ho Jezús.
Maria Domenica Mazzarello nia mensajen edukativu hahú husi edukasaun ba profisaun ho badinas no akompaña ho klima ksolok nian tuir dalan ba santidade iha simplisidade moris loroloron nian, maibé, nakloke ba apostoladu maski husu aten-barani boot.