Maromak nia Liafuan ne’ebé liturjia Domingu da-24 Tempu Komún ne’e propoin mai ita ko’alia kona-ba perdaun. Nia aprezenta mai ami Maromak ida ne’ebé hadomi hodi la kalkula, lahó limite no sasukat; no konvida ita atu asume atitude hanesan ba maun no biin-alin sira ne’ebé, loron ba loron, la’o iha ita-nia sorin.

Evanjellu ko’alia mai ita kona-ba Maromak ida nakonu ho laran-di’ak no mizerikórdia ne’ebé suli iha nia oan sira nia leten – ho forma totál, lahó limite no absoluta – ninia perdaun. Fiar-na’in sira simu konvite atu deskobre Maromak nia lójika no husik atu lójika perdaun nian no mizerikordia nian laho limite no sasukat marka sira-nia relasaun ho maluk sira.

Leitura dahuluk halo klaru katak laran-nakali no rai-kunan mak sentimentu aat sira, ne’ebé la konvein ba ema nia ksolok no realizasaun. Nia hatudu oinsá la iha lójika atu hein iha Maromak nia perdaun no lakohi perdua maluk ida; no aviza katak labele estraga ita-nia vida iha rai ne’e  ho sentimentu sira, ne’ebé hamosu de’it ksolok-laek no sofrimentu.

Iha leitura daruak Paulo sujere ba sarani sira Roma nian katak komunidade sarani tenke sai fatin domin nian, respeitu nian ba ema seluk, aseitasaun diferensa sira-nian, perdaun nian. Ema ida labele despreza, julga eh kondena maun no biin-alin sira ne’ebé iha perspetiva diferente.Jezús nia makturi sira tenke hanon nafatin katak iha buat fundamentál ida ne’ebé kesi ita hotu: Jezús Kristu, ita-nia Na’i. Buat seluk la iha importánsia boot.

Download