Loron dalimak Ezersísiu Espirituál 2013

 

Dili – Estratéjia espirituál ida atu hasoru perigu sira iha dixipuladu no misionariedade mak “kombate espirituál” ka “axeze”. Dalan santidade nian husu kombate espirituál (VC 38}. Atu bá funu ita presiza estratéjia ida. Jezús, iha Evanjellu Mateus nian sujere estratéjia ruma funu nian: “separasaun radikál (Mt.10,34), hewai an rasik (Mt10,37-39), no promesa simu liu atus ida (Mt10,40-42)”, Bispu Panfilo hateten iha ninia konferénsia loron dalimak retiru nian.

Estratéjia separasaun radikál nian mak konvite atu la hakmatek ho an rasik, katak ho ita-nia mediokridade no ho ita-nia salan sira. Ne’e katak ita tenke filafali ba orasaun; tenke tesi kotu tali ne’ebé kesi ita ba sasán sira ka apegu seluseluk.

Iha konferésnia kona-ba separasaun ne’e lori mós atu haree fila fali votu kastidade nian, atu iha domin loos ida de’it no la husik fuan fahe ba ema seluk, atu la hateke ba ema seluk nia to’os.

Estratéjia daruak mak hewai an rasik (Mt10,37-39). Kristu oferese mai ita podér atu manán buat hotu: Krús. Ita presiza “lori fali axeze iha formasaun no iha kandidata sira ba vida relijioza nia moris”, Amu Panfilo hateten. “Axeze fundamentál; axeze tulun atu domina no korrije tendénsia natureza umana nian ne’ebé hetan kanek husi salan, no indispensavel ba ema konsagrada atu mantein fiél ba vokasaun rasik no tuir Jezús iha dalan Krús nian” (VC.38).

Área rua ne’ebé ita salezianu/a sira bele mate duni ba an rasik mak área prezensa nian no área tempu nian. FMA nia prezensa mak prezensa sakramentál, sinál prezensa Maromak nia domin nian, maibé “infelizmente dala barak ita sai hanesan sira, hodi haluha katak ita iha mundu maibé la’ós mundu nian. Amu-Papa Francisco hateten katak ita tenke sai husi ita-nia konventu sira no bá iha ne’ebé bibi sira hela bá. Maibé la dehan katak ita tenke sai hanesan bibi…”

Reitór-Mor hakerek: “Liufali ita-nia uma sira, obra sira no organizasaun sira, Kreda presiza ita-nia vida konsagrada nia prezensa, ita-nia taturi Kristu ne’ebé radikál. Papa Bento fó hanoin mai ita: ‘Hasoru edonizmu ne’ebé avansa, iha pedidu sasin ho aten-barani kastidade nian nu’udar espresaun fuan ida-nian ne’ebé koñese beleza no folin Maromak nia domin nian. Hasoru hamrook osan nian ne’ebé prevale ohin loron iha ne’ebé-ne’ebé, ita-nia moris sóbria, pronta atu serví ema ne’ebé presiza liu, mak apelu ida katak Maromak mak rilusoin ne’ebé la nahas. Hasoru individializmu no relativizmu ne’ebé lori ema atu sai regra ba an rasik, imi-nia moris fraterna, bele sai koordenada no, tanba ne’e, iha kapasidade ba obediénsia, hodi konfirma katak imi tau imi-nia satisfasaun iha Maromak (AGC, 394).

Kastidade mak sei hahoris oan espirituál. Ita hanoin buat ne’ebé Papa Francisco dehan ba Superiora Jerál sira: “imi-nia kastidade tenke fó fuan, kastidade ida ne’ebé hahoris oan mane no feto iha Kreda. Feto konsagrada mak inan la’ós solteirona. Deskupla se ha’u ko’alia nune’e, maibé maternidade iha vida konsagrada, fertilidade importante duni”.

Área tempu nian, sai axese, bainhira ita hatene uza tempu di’ak atu hela ho ema hotu ne’ebé presiza liu, liuliu foin-sa’e sira ne’ebé kiak liu: kualidade tempu nian ho sira.

Promesa ba simu naresin liu atus ida (Mt10, 40-42).Ita iha serteza katak ita sei simu prémiu, no ida-ne’e sai “hun inspirasaun nian no kbiit atu persevera no supera perigu sira ne’ebé ita hetan iha misaun”, Amu Francesco dehan. “Maibé la signifika serbisu atu hetan prémiu ida”, Bispu resalta.

Nu’udar ema ita iha nesesidade umana; ita la bele espiritualiza buat hotu. Dala ruma ita presiza simu korajen, apresiasaun no parabéns mós. Dala barak ita la halo ida-ne’e entre ita no mós ho ita-nia kolaboradór/a sira.