Festa Agradesimentu Inspetoriál besik dauduan. No tan iha tinan ne’e ita selebra tinan 140 Primeira Espedisaun Misionária FMA nian, tan ne’e ba tinan ne’e ita-nia tema mak “Ho Fuan Ita Agradese ba Laran Manas Misionária”.

Komunidade sira hahú reza ba malu loron ruma liubá ba komunidade sanulu-resin-rua Inspetoira FMA TIN nian.

Aleinde ne’e iha mós atividade seluk hanesan formasaun kona-ba espedisaun misionária no lectio divina ho komunidade edukativa.

Tuirmai komunidade ruma nia news:

“Relasiona ho festa agradesimentu Ispettoria nian liuliu ba madre Provinsial TIN me. Alma Castagna no ba irmã ida ne’ebé mak sei halo iha loron 10 fulan setembru, ami irmã, novisa no oratorianu sira husi sentru rua Maria Ausiliadora no JP II, komunidade S. José (Dili) halo Lectio Divina ne’ebé mak Ispettoria prepara ona, nune’e nu’udar ami-nia sentidu hola parte ba Institutto maibé liuliu hanorin foin-sa’e no labarik sira atu hatene reza no agradese ba malu, ba irmã sira ne’ebé tau-matan no liuliu reza Me. Provinsial liuhusi Lectio ne’ebé mak ami halo ona. Agradese ba akompañamentu  liuliu nu’udar bin iha ami-nia leet” (Lucia Pereira-Novisiadu-Comoro, Dili).

****

“Loron 3 Setembru, ami Irman nain 5 hamutuk ho kolaboradores nain 5 no animadores sira nain 5 husi Sentro 3 (Waibua, Waihako no Lia -oly), mai halibur hamutuk iha komunidade hodi hala’o Lectio Divina ne’ebé nu’udar dalan preparasaun ba festa agradesimento ba Madre Provinsial. Ami haksolok tamba ema hirak ne’ebe ami konvida hotu marka presenza no disponivel atu rona, riflete,  fahe  Maromak nia Liafuan . Pasajen ne’ebe ne’ebe ami medita mai husi Evanjellu San Mateus nian  kapitulu 10 versikulu 7 too 15.

Molok atu hahu Lectio Divina, Madre Cecilia nudar superiora foun ba komunidade ne’e, nia apresenta an uluk, hafoin tuir mai madre apresenta tema ba ita nia selebrasaun agradesimentu nian ba tinan ida ne’e: “Ho fuan agradese halakan laran manas misionariu”. Tema ida ne’e iha ligasaun ba selebrasaun 140 º aniversariu primeira espedisaun misionariu FMA nian.  Ho tema ne’e , konvida  irman sira , leigu kolaborador sira no animador foinsa’e sira atu iha laran manas misionariu nian,  tan Maromak haruka  ita hotu nu’udar sarani atu sai misionariu katak atu haklaken Kristu hodi liafuan no moris  sasin nian.

Iha klima silensiu nian iha kapela laran, ami halo Lectio tuir eskema ne’ebe iha: leitura testu nian, meditasaun no reflesaun ba pergunta sira e depois kondivisaun no orasaun. Partesipante sira fahe sira nia esperiensia rasik  kona ba buat kmanek hotu sira simu husi Maromak liu FMA sira no sira agradese ho fuan tomak . Agora sira mos koko atu fo ba ema seluk buat ne’ebe sira simu hodi sai disponivel no laran luak no aten brani atu kolabora iha aktividade Parokia nian no iha oratoriu.

Hotu tiha lectio, Me . Cecilia fahe ba sentru ida-idak materiale  kona ba biografia badak  irman salesiana  misionaria dahuluk nian nain neen, atu sira bele le’e no bele koñese sira. Hodi ida ne’e  bele halakan sira nia espiritu misionariu.

Nu’udar komunidade edukativa,  ami oferese orasaun ba komunidade ida-idak iha ispetoria no ba Madre Provinsial , Me Alma  ho fuan nakonu ho domin no gratidaun” (Komunidade Maria Auxiliadora, Venilale).