Maun no biin-alin sira, bondia!

Pasajen evanjélika ohin nian (kf Mt 16,21-27) mak kontinuasaun ida domingu kotuk nian, iha-ne’ebé salienta Pedro nia profisaun fiar nian, “fatuk” iha-ne’ebé Jezús hakarak harii ninia Kreda. Ohin, ho kontrastu boot, Mateus hatudu reasaun Pedro ninan bainhira Jezús revela ba dixípulu sira katak iha Jeruzalém nia tenke terus, ema oho nia, moris hi’as (kf v. 21). Pedro lori ketka Jezús no haksiak nia ba buat ne’e – dehan ba Nia – buat ne’e labele akontese ba Nia, Kristu, Maibé Jezús, husi nia parte, haksiak Pedro ho liafuan mak’as: «Bá iha ha’u-nia kotuk, Satanás! Ó sai eskándalu mai ha’u, tanba ó la hanoin tuir Maromak, maibé tuir ema sira!» (v. 23). Momentu ida molok, apotolu ne’e fó bensan ba Maromak, tanba simu husi Nia revelasaun ida-ne’e, nia mak “fatuk” metin ida atu Jezús harii ninia komunidade bá; no tuir kedas mai nia sai obstákulu ida, fatuk ida maibé la’ós atu harii, fatuk sidi ida iha Mesias nia dalan. Jezús hatene didi’ak katak Pedro ni sira seluk sei iha dalan naruk atu halo para bele sai ninia apóstolu sira!

Iha pontu ida-ne’e, Mestre dirije ba sira hotu ne’ebé tuir Nia, aprezenta momoos ba sira dalan atu tuir:: «Imi ruma hakarak tuir ha’u, foti nia krús no tuir Ha’u» (v. 24).  Nafatin, ohin mós, iha tentasaun atu tuir Kristu lahó krús, liután, atu hanorin Maromak sá loos dalan ne’ebé justu; hanesan Pedro: “Lae, lae Na’i, ida-ne’e lae, ida-ne’e sei la akontese”. Maibé Jezús fó hanoin mai ita katak ninia dalan mak dalan domin nian, no la’ós domin loos lahó sakrifísiu an rasik nian. Ita simu bolun atu keta husik vizaun mundu nian tolan ita, maibé atu sai nafatin konxiente kona-ba nesesidade no difikuldade mai ita sarani sira atu la’o kontro-korrente no iha subida.

Jezús kompleta nian proposta ho liafuan sira ne’ebé esprime sabedouria ida boot no vale nafatin , tanba sadik mentalidade no konportamentu egoséntriku sira. Nia ezorta: «Ema ne’ebé hakarak salva nia moris rasik, sei lakon; maibé ema ne’ebé lakon nia moris tanba ha’u, nia sei hetan fali» (v. 25). Iha paradoksu ida-ne’e kontein regra osan-mean ne’ebé Maromak hakerek iha natureza umana Nia kria iha Kristu: regra katak domin de’it mak fó sentidu no ksolok ba moris, Uza talentu rasik, enerjia rasik no tempu rasik la’ós de’it atu salva, rai no realiza an rasik, iha realidade lori atu lakon an rasik, katak ezisténsia ida triste no estéril. Iha kontráriu mai ita moris ba Na’i no estabelese ita-nia moris iha domin, hanesan Jezús halo: ita bele saboreia ksolok auténtiku, no ita-nia moris sei la sai estéril, sei sai fekundu.

Iha selebrasaun Eukaristia nian ita moris hikas fali mistériu krús nian; la’ós de’it hanoin hikas, maibé halo memoriál Sakrifísiu makso’in, iha ne’ebé Maromak nia Oan-Mane lakon kompletamente An rasik atu simu hikas fali husi Aman i nune’e ita hotu sei hetan ita-nia an rasik, ne’ebé lakon, hamutuk ho kriatura tomak. Kadavéz ida partisipa iha Santa Missa, Kristu hedi iha krúz no moris hi’as nia domin, komunika mai ita nu’udar ai-han no bebida, atu ita bele tuir Nia iha dalan loroloron nian, iha servisu konkretu ba maun-alin sira.

Maria Santíssima, ne’ebé tuir Jezús to’o iha Kalváriu, akompaña mós ita no tulun ita atu keta ta’uk krús, maibé ho Jezús hedi iha krús, la’ós krús ida lahó Jezús, krús ho Jezús, katak krús atu terus tan domin ba Maromak no maun-alin sira, basá sofriemntu ida-ne’e, hodi Kristu nia grasa, sai fekundu ho moris-hi’as.