Dili – “Ohin Madre sira Filhas de Maria Auxiliadora iha Timor-Leste, laran kontente no haksolok tanba kontinua koko Maromak nia domin boot iha sira tanba vokasaun ida-idak manifesta ninia domin”. Ne’e mak liafuan sira husi Amu-Bispu Virgílio do Carmo da Silva SDB, Bispu Dioseze Dili nian, iha ninia omilia, iha Missa solene Profisaun Perpétua Irmán FMA na’in haat nian: Ir Ana Ivónia Sequeira (Baucau), Ir Felizarda Marçal Ximenes (Baucau), Ir Jacinta de Sousa Guterres (Venilale-Baucau) no Ir Noémia Belita de Deus Magalhães (Letefoho-Ermera).

Nakonu ho gratidaun “ba Maromak ami-nia Mahein” (kf Sl 23) nu’udar sira-nia pasajen bíblika dehan, ba sira-nia dalan, tanba Nia haraik ba sira rikusoin boot liu, duradoiru, no la’ós efímeru: ohin Nia konsagra no hatais sira ho vokasaun saleziana ba nafatin hodi halo profisaun perpétua. Dalan naruk ida, ne’ebé Maromak halo ho sira, liuhusi ema barak ninia apoiu no akompañamentu, hahú husi família, to’o ba Irmán formadora sira, komunidade no amlulik sira.

Sentidu ba profisaun relijioza mak komuñaun moris nian ho Maromak ne’ebé garante perseveransa ba moris tomak. “Ita la sai relijioza atu halo buat barak, maibé atu moris komuñaun ho Ida-ne’ebé bolu ita”, Amu-Bispu Virgílio salienta. Nune’e, nia hein katak faxíniu ba Jezús Kristu, ba amizade ho Nia, halo sira tesi kotu ona talin “amizade inutil” sira seluk no livre atu hadomi de’it Jezús.

Ho profisaun peprétua Irmán sira sai profisionál kona-ba Maromak, iha moris konsagrada, moris votus “kastidade, pobreza no obediénsia”. “Se karik ida de’it mak falta husi ita-nia tatuir Kristu besik liután, ita sai relijioza/u ga lae?”, Amu-Bispu Virgílio husu. Iha votus livre no konxiente, mak sinál enkontru domin nian entre Maromak no konsagrada sira, no ita bele sukat profisionalizmu ne’e liuhusi sira nia sasin ne’ebé bele haree no kona no sasin kredível.

Iha ninia lia-menon, Ir Alma Castagna, provinsiál FMA TIN husu ba “família atu kontinua reza ba sira” tanba “ita bele hetan krús iha dalan ida-ne’e, la’ós ksolok de’it”. Ho orasaun husi família, husi Irmán sira, “ita bele hakat ba oin maski karik dalan sa’e uitoan, no iha ne’ebé mak dalan sa’e la tama? Sira dehan ‘ba nafatin’ no ita fiar katak ‘ba nafatin’ ida ne’e metin”. Hafoin, nia fó sai Irmán sira ne’ebé foin halo profisaun perpétua nia obediénsia foun hahú husi fulan Novembru mai. Irmán Jacinta Guterres sei bá Roma (Casa Generalizia) iha fulan Dezembru; Ir Felizarda hela nafatin iha kapitál maibé muda ba Balide; Ir Ana Ivónia hela nafatin iha dioseze Baucau, maibé bá hela iha Baucau; Ir Noémia troka nasaun no nia sei bá Sumba. Ir Alma remata hodi dehan katak “ho tinan foun, atividade foun no knaar foun, ita reza ba sira atu sira bele hahú ho ksolok no entuziazmu, buat ne’’ebé Maromak husu ba sira iha fatin hirak ne’e”.