Dili – Iha loron 29 Agostu, komunidade Divina Providenza simu vizita husi konsagrada na’in rua husi Japaun no Xina ne’ebé akompaña husi Pe. Acacio Sdb. Konsagrada sira ne’e mai husi Institutu Sekular ida ne’ebé hanaran VDB (Volontária de Dom Bosco). Sira to’o iha komunidade tuku 17:00 no hahu kedas halo inkontru ho menina sira. Iha inkontru ne’e, Pe. Acaçio ne’ebé responsavel ba grupu (VDB), hato’o informasaun ruma kona-ba Institutu Sekular ne’e ninia identidade, espiritualidade no misaun.

VDB mak institutu sekular ida ne’ebé hola parte iha Família Saleziana no ema ne’ebé atu tama iha institutu VDB mak feto sira  ne’ebé hakarak konsagra-an ba Maromak atu hala’o misaun ida secular no Saleziana iha mundu ou iha sosiedade nia leet. Sira ne’e halo votus hanesan konsagrada sira seluk maibé sira moris mesak ou ho Família hodi hala’o kna’ar hanesan leigu sira no hala’o  serbisu tuir ida-idak nia profisaun (Mestre, doutor, juiz, ect…), maibé sira nafatin iha sentidu hola-parte nian ba institutu no ba kreda.

Iha moris konsagrasaun nian, sira buka atu moris ho plenitude valor sira evanjellu iha sira nia moris lor-loron no buka atu dedika-an tomak ba realizasaun valor sira iha ambiente ne’ebé sira moris daudaun tuir inspirasaun evanjeliku (Mat. 5:13-14), “Sai masin no roman mundu nian.” Tanba VDB nia misaun mak iha kampu ou sosiedade nune’e buka atu moris ho responsabilidade ba kna’ar ne’ebé halo no hatan nafatin ba Maromak nia bolu liu-hosi empeñu lor-loron nian ho radikalidade.

Konsagrada sekular VDB hala’o nia misaun iha sosiedade nia leet tuir karizma saleziano nian hodi konsagra-an ba Maromak iha kreda no iha mundu. Iha sira nia saran-an sira sei atu moris iha liberdade interior, iha ksolok no ho optimizmu atu hasoru risku sira mundo nian. Institutu ida ne’e iha nia autonomia no nia karakteristika rasik no rekoñese iha Família saleziana. Institutu ne’e harii ho official iha loron 20 Maiu 1917. Ninia fundador mak Beato Filipe Rinaldi, susesor Don-Bosco datoluk. Ohin loron sira prezente iha kontinente 5 hodi moris nu’udar dixipula Kristu nian iha sasin.

Enkontru ne’e hala’o durante oras ida ho balun (17:00-18:30). Depoizde enkontru sira halo merenda hamutuk ho menina sira hafoin ba vizita Bispo D. Virgilio do Carmo, SDB iha nia rezidensia. Enkontru ne’e lao ho diak no haksolok hodi simu no fahe esperiensia ba malu nu’udar Família.

(Miranda da Cruz)