Lospalos – Tinan-tinan joven sira husi Movimentu Juveníl Salezianu (MJS) halibur hamutuk atu haksolok, partilla, reflete, aprende no reza. Tinan 2017 sira hamutuk ema na’in 500, halibur malu iha Lospalos husi loron 25-27. Joven sira-ne’e mai husi uma saleziana hotu SDB no FMA nian. Tema ne’ebé sai nu’udar reflesaun ba tinan ne’e mak tema ba sínodu estraordináriu Bispu sira-nian iha 2018: “Foin-sa’e sira, fiar no dixernimentu vokasionál”.

Atividade ne’e hahú ho abertura ho Missa no avaliasaun kona-ba implementasaun atividade sira tinan 2016 nian. Iha loron daruak sira reflete kona-ba “Foin-sa’e sira, fiar no dixernimentu vokasionál”, aprezenta husi Ir Jacinta Gusmão FMA. Apprezentasaun hahú ho pergunta fundamentál joven evanjellu nian “Mestre diak, Ha’u sei halo sa atu bele hetan moris rohan laek?”  (Marcos 10,17-25), ne’ebé reprezenta foin-sa’e hotu nian.

Saida mak dixernimentu no akompañamentu

Dixernimentu mak arte atu lee ba diresaun ida ne’ebe mak fuan nia hakaran sira lori ema, hodi la husik atu babeur lori ita ba ne’ebe ita lakohi ba’. Etimolojia husi “cernere (lia-latin) ne’ebé signifika taes, peneira, distinge, tetu.” Distinge mak intelijénsia nia obra atu haree buat ne’ebe la hanesan iha buat ne’ebe hanesan. Nia kontrariu mak konfuzaun, caos…tuir de’it pulsaun sira.

Tanba ema nia asaun la mai husi razaun maibe husi domin, husi hakaran ksolok nian, husi sentimentu iha nia laran ne’ebe dada nia. Ema presiza aprende distinge nia fuan nia movimentu sira/ sentimentu sira nia hun husi ne’ebé no lori bá ne’ebé nune’e nia bele fo atensaun ba ida ne’ebe di’ak no hewai ida ne’ebe la di’ak. Ita dixerne tu ita-nia hahalok sai umanu – konxiente no husi hakaran rasik, livre no responsavel, ho kapasidade atu deside saida mak hakarak halo no fó orientasaun ba moris.

Akompañamentu mak instrumentu atu rekoñese Na’i nia bolun ba ksolok domin nian no hili atu fó resposta. Nia finalidade mak atu favorese relasaun ka enkontru entre ema no Na’i hodi kolabora atu hasai  obstákulu ne’ebé impede relasaun ne’e.

Loron daruak ne’e, mak loron nakonu didi’ak. Aleinde reflesaun no hatán ba pergunta sira sínodu nian, atividade seluk ne’ebé joven sira halo mak workshop formativu kona-ba atividade sira hala’o iha Oratóriu hanesan teatru “lalatak”, katekeze nia programasaun, kriatvidade, “sulap” ka májiku, jogu edukativu, inventa animasaun, nst. Sira mós halo selebrasaun penitensiál no hakbesik ba sakramentu peniténsia no rekonsiliasaun no taka ho “kalan kulturál”.

Loron ikus taka ho selebrasaun eukarístika konselebrada husi amlulik salezianu sira hamutuk ho amlulik salezianu foun na’in tolu ne’ebé ordena iha loron 15 Agostu liubá: Pe Júlio da Silva Mota, Venâncio Fátima Freitas no Isaías Bonifácio. Iha omilia, Pe Isaías konvida joven sira atu fila husi forum ne’e sai”ponte”,  no Jezús Kristu nia “ibun” no liman-ain” ba maluk sira hodi lori amizade no kuda fini Maromak nia Liafuan nian ba joven barak ne’ebé dook husi Igreja.

Atu remata ninia omilia, Pe Isaías, hodi foti Reitór-Mor nia estreia ba 2018, husu atu joven sira atu aprende ba hasoru ema. Reitór-Mor hateten katak iha enkontru ho ema seluk ita labele husik buat negativu maibé buat pozitivu atu fó forsa ba moris. Presiza hasai prejuizu hotu husi ita nia hanoin atu bele kria relasaun no amizade.