RV/Zenit – Papa Francisco nia ensíklika dahuluk, “Lumen Fidei” (Roman Fiar nian), marka atu publika iha loron sesta oin no sei aprezenta iha konferénsia imprensa iha Santa Sede nia Sala Imprensa.

Kardeál Marc Ouellet, prefeitu Kongregasaun Bispu sira-nian, sei aprezenta ensíklika hamutuk ho Arsebispu Gerhard Ludwig Müller, prefeitu Kongregasaun ba Doutrina Fiar nian, no Arsebispu Rino Fisichella, Prezidente Konsellu Pontifísiu ba Promosaun Evanjelizasaun Foun nian.

Iha tempu ruma liubá, Papa Francisco fó sai kona-ba ensíklika ba Tinan Fiar nian durante enkontru membru sira Konsellu Ordináriu XIII Sekretariadu Jerál Sínodu Bispu sira-nian, hodi hateten katak ida-ne’e “liman haat” nia serbisu. Santu Padre hateten ba bispu sira katak, Amu-Papa eméritu Bento XVI entrega ba nia ezbosu ensíklika nian ne’ebé enfrenta tema oioin kona-ba fiar.

Entre tema sira mak natureza kolejialidade no estrutura sínodu nian iha ninia servisu ba Kreda universál nia misaun no iha kooperasaun ho ministériu Petrinu, krize família nian, kuidadu ba orden kriasaun nian, no rekuperasaun kona-ba komprensaun integrál no totál kona-ba ema.

“Ne’e mak dokumentu kbiit maka’as ida”, Papa Francsico hateten iha loron 13 Juñu. “Serbisu nia parte boot nia mak halo (Bento XVI).”

Papa Francisco mós revela katak nia prepara hela ezortasaun ida kona-ba evanjelizasaun ne’ebé foti referénsia husi Sínodu Bispu sira-nian kona-ba Evanjelizasaun Foun ba Fiar nia tranzmisaun iha tinan kotuk.

“Ha’u hanoin katak Tinan Fiar nian sei la remata lahó dokumentu ida ne’ebé bele tulun ita”, Amu-Papa hateten.  “Nune’e ha’u hanoin kona-ba ne’e: ezortasaun ida kona-ba evanjelizasaun ne’ebé  nia referénsia mak Sínodu. Bele foti nia husi Sínodu maibé ho kuadru luan liután. Ha’u gosta ideia ne’e no ha’u sei tuir dalan ne’e. Ha’u hakerek ona buat ruma no iha Agostu, bainhira ha’u hakmatek liután iha uma, ha’u bele [kontinua hakerek’ no lori nia ba oin”.