Venilale – Klínika Maria Auxiliadora Venilale, nafatin hetan ajuda husi doutór sira mai husi nasaun hanesan Austrália, Polándia, España, Itália.

Iha loron sira ne’e mai doutór espesialista iha akupuntura husi organizasaun non-governamentál AGOM (Agopuntura nel mondo), tradús “Akupuntura iha mundu”. Sira-nia NGO mak Organizasaun No Profit ho Utilidade Sosiál (ONLUS) italiana ho sede iha Milano. Sira tinan-tinan hala’o misaun volontariadu médiku iha parte sira mundu nian.

Tinan 2017 iha team rua AGOM nian ne’ebé halo tratamentu ba moras sira iha Venilale no Dili husi loron 13-29 Agostu 2017 no grupu daruak husi 3-18 Setembru 2017.

Dr. Carlo Moiraghi no Dra Paola Poli mak médiku na’in rua grupu dahuluk ne’ebé serví moras sira ho konsulta ba dala 360 iha loron sira-ne’e. Tratamentu akupuntura ne’e tratamentu la’ós ho ai-moruk maibé hodi atinje ba medisina tradisionál Xina nian bele tulun kura ka alivia moras barak. Tuir doutór Carlo nia hanoinn, tratamentu ida-ne’e di’ak ba País kiak sira ka susar atu hetan ai-moruk, hanesan iha Timor-Leste, liuliu bainhira ema sira fiar-metin ba tratamentu sira hanesan tipu ne’e. Tanba tuir niahare, akupuntura uza daun, no daun la karu iha rai parte ida-ne’e.

Atu dezenvolve espesializasaun iha akupuntura, iha Itália,  presiza estuda tinan tolu depoizde medisina jerál. Iha fatin seluk ema bele sai espesialista maski la hasai medisina. Iha eskola barak kona-ba tradisaun ida-ne’e. Ezemplu, bainhira tuu daun tenke provoka moras ka hanesan xoke eletrisidade nian. Enkuantu tratamentu husi AGOM ne’e, la halo moras. Ema-moras sira ne’ebé simu tratamentu akupuntura iha Venilale, agradese tebes ba AGOM liuhusi ninia prezidente rasik, Dra Paola Poli no vise-prezidente Dr Carlo Moiraghi.