Fuiloro – Loron 07, agostu too loron 23, Irmán  nain 6, Irmán Grinalda, Ir. Maria Soares, Ir.Ana Ivonia, Ir. Felizarda, Ir. Noemia no Ir. Jacinta Guterres, hala’o sira nia formasaun segundu novisiadu iha komunidade Morano Fuiloro, kona-ba votus kastidade, obediénsia no pobreza ne’ebé aprezenta husi Provinsiál, Ir Alma, Ir Sebastiana no Ir Carmen Ramos. Segundu novisiadu ne’e nu’udar preparasaun va votus perpétuu eh kompromisu ho Na’i ba nafatin.

Tuir mai Irmán sira nia partilla.

 

VOTU KASTIDADE

Votu kastidade mak enkarnasaun domin nian.

Buat hotu presiza intrega-an ba malu: ita nia temperamentu, aspetu umanu feto ka mane presiza la’o hamutuk ho ita-nia fiar, ho ita-nia karidade no domin ba Maromak. Domin ida ne’e tenke “foti isin” ka inkarna iha ita nia aspetu psikolójiku, maski fraku no delikadu.

ASPETU SIRA KASTIDADE NIAN

• Isin:ita nia isin, koalia lian domin nianne’ebe sai prezente ba ema seluk no hari komunaun entre ema sira.
• Karákter : domin mai husi vontade, domin sai loos no tasak, domin ne’ebe hatene halo desizaun: . Hilin koerente, hilin ho signifikdu, hilin ho autotransedente.
• Karidade : aspetu importante liu ne’ebe fo kbiit, dudu aspetu sira seluk, tanba simu kbiit husi espiritu santu.

 

VOTU OBEDIÉNSIA

Ita obedese ba Maromak nia Reinu. Obediénsia la’ós renunsia ba propria vontade/ hakaran rasik. Obediénsia mak adezaun ba lia-loos, la’ós ba ema seluk nia vontade, buka lia-loos maromak nia hakaran. Ita obedese tanba Kristu rasik obedese nia Aman to’o mate iha krús (signifikadu teolójiku), no ida-ne’e mak espesífiku domin nian. Bainhira ita obedese, ita abandona an tomak ba Maromak nia liman. Iha mós obediénsia resíproka maun-alin eh biin-alin nian. Ita halo ida-ne’e hodi rona maluk sira no rekoñese maluk sira nu’udar don Maromak nian, nune’e bele serbisu ha,utuk ho korresponsabilidade iha misaun edukativa.

Mediasaun husi autoridade atu buka Maromak nia hakarak. Obediénsia ne’ebé tasak hatene simu servisu komunitáriu, hilin atu halo pasu hamutuk ho Irmán sira, la’ós hili ema ruma de’it atu servisu hamutuk.

 

VOTU POBREZA

Votu pobreza mak votu ne’ebe halo tuir Kristu ne’ebé riku halo An kiak atu hariku ita. Nune’e ita saran an tomak ba Maromak hodi husik ita-nia an iha Nia liman no moris tuir Nia haruka sira.

Moris pobreza mak haksolok nafatin ho buat ne’ebé iha, simples, serbisu badinas, laran metin ba providénsia, mortifika-an, dependénsia, haraik-an atu husu, kuidadu sasán, uza buat ne’ebé komunidade oferese no tau matan ba malu nu’udar biin-alin.

Hanesan Jezús halo an kiak, ita htudu sasin pobreza nian husi fuan, nune’e bele livre no la kesi an ba buat ida; moris ho atitude labarik nian ne’ebé nafatin tau laran metin ba Aman Maromak; renunsia hakarak sira ne’ebeé kontra pobreza, la akumula sasan ba an rasik, livre husi eskravidaun sasán nian, agradese ba buat ne’ebé komunidade oferese no kontente ho buat ne’ebé nesesáriu.

“Iha okaziaun ne’e ami hakarak hato’o ami nia agaradese wain ba Maromak ne’ebe fó moris no bolu ami iha dalan ida ne’e. Agradese mós ba institutu  liu husi Madre Provinsial no Konselleira sira ne’ebe fó oportunidade mai ami atu hakle’an liután ami-nia domin ba Jezús liu husi formasaun sira. Ami agradese Irmán na’in tolu ne’ebe akompañ ami iha ami-nia formasaun durante fulan ida, agradese mós ba komunidade Madre Morano Fuiloro, agradese mos ba Irmán hotu ne’e suporta ami ho orasaun no susbtitui ami nia knaar iha komunidade. Maromak sei selu di’ak hotu ne’ebe imi halo ba ami. OBRIGADA BARAK”.