Maun no biin-alin sira, bondia!

 

Evanjellu ohin nian (Mt 15,21-28) aprezenta mai ita ezemplu ida Jezús nia enkontru ho feto kananeia ida, ema estranjeira kona-ba lei judeu sira nian. Epizódiu ne’e akontese iha dalan ba sidade Tiro no Sidon, iha noroeste Galilea nian: iha ne’e mak feto husu Jezús atu kura nia oan-feto ne’ebé – Evanjellu hateten – «diabu haterus maka’as» (v. 22). Na’i, iha momentu dahuluk ida, hanesan la rona ninia hakilar terus nian, to’o hamosu intervensaun husi dixípulu sira ne’ebé harohan daet ba nia. Jezús nia hadook-an aparente ne’e la dezanima inan ida-ne’e, ne’ebé insiste iha ninia invokasaun.

Forsa interiór feto ne’e nian, ne’ebé permiti atu manán obstákulu hotu, ita ba buka iha ninia domin maternu no iha ninia konfiansa katak Jezús bele rona ninia pedidu. No ida-ne’e halo ha’u hanoin ba feto sira nia forsa. Ho sira-nia fortaleza sira iha kapasidade atu obtein buat boboot. Ita hatene kona-ba ne’e barak! Ita bele dehan katak ho sira-nia domin ne’ebé book fiar no fiar, husi nia parte, sai prémiu domin nian. Domin maka’as ba oan-feto rasik lori «atu hakilar: “Sadia ha’u, Na’i, David nia oan!”» (v. 22). No fiar perseverante iha Jezús konsente atu la dezanima hasoru ninia lakohi iha inísiu; nune’e feto «hakneak iha nia oin hodi dehan: “Na’i, tulun ha’u!”» (v. 25).

Ikusmai, iha perseveransa mak’as nia oin, Jezús admira, hanesan hakfodak, ba feto jentia ne’e nia fiar. Nune’e, nia konsente hodi dehan: «“Feto, ó-nia fiar boot duni! Sai tuir duni buat ne’ebé ó hakarak”. No husi momentu ne’e nia oan-feto hetan kedas isin di’ak» (v. 28). Feto haraik an ida-ne’e Jezús hatudu ni’udar ezemplu fiar ne’ebé la nakdoko. Ninia insisténsia atu invoka Kristu nia intervensaun nu’udar estímulu mai ita atu keta dezanima, atu la dezespera bainhira provasaun todan moris nian hanehan ita. Na’i la fila oin ba sorin seluk iha ita-nia nesesidade sira nia oin no, se dalaruma nia la sensivel ba pedidu sira tulun nian, ne’e atu koko no habiit ita-nia fiar. Ita tenke kontinua hakilar hanesan feto ida-ne’e: “Na’i, tulun ha’u! Na’i, tulun ha’u!”. Hanesan ne’e, ho perseveransa no korajen. Ida-ne’e mak korajen ne’ebé presiza iha orasaun.

Epizódiu evanjéliku ida-ne’e tulun ita komprende katak ita hotu ppresiza sai boot iha fiar no habiit ita-nia konfiansa iha Jezús. Nia bele tulun ita atu hetan hikas dalan, bainhira ita lakon bussóla ba ita-nia dalan; bainhira lurón la’ós tetuk maibé toos no difisil; bainhira difisil atu sai fiél ba ita-nia empeñu sira. Importante atu habiit ita-nia fiar loroloron, hodi rona ho atensaun Maromka nia Liafuan, ho selebrasaun Sakramentu sira-nian, ho orasaun pesoál nu’udar “hakilar” ba Nia – “Na’i, tulun ha’u!” -, no ho atitude konkretu karidade nian ba maluk.

Ita entrega an ba Espíritu Santu atu Nia tulun ita persevera iha fiar. Espíritu hatam audásia iha fiar-na’in nia fuan; haraik ba ita-nia moris no ba ita-nia sasin sarani  forsa konviksaun no perzuasaun nian; enkoraja ita atu manán fiar-laek ba Maromak no indiferensa ba maun-alin sira.

Virjen Maria halo ita sai konxiente ba beibeik kona-ba ita-nia nesesidade Na’i nianno ninia Espíritu nian; haraik mai ita fiar forte, nakonu ho domin, no domin ida ne’ebé hatene sai súplika, súplika korajoza ida ba Maromak.