Sentru ba reflesaun litúrjika Domingu XXI Tempu Komún nian mak tema sentrál rua ba ezisténsia sarani: Kristu no Kreda.

Evanjellu konvida dixípulu sira atu adere ba Jezús no simu Nia nu’udar “Mesias, Maromak nia Oan”. Husi adezaun ne’e, Kreda moris – komunidade dixípulu Jezús nian, ne’ebé halibur no organiza an haleu Pedro. Kreda nia misaun mak fó sasin kona-ba proposta salvasaun ne’ebé Jezús lori mai. Kreda no Pedro simu kbiit xave sira nian – katak, interpreta Jezús nia liafuan sira, adapta Jezús nia hanorin sira ba dezafiu sira mundu nian no simu iha komunidade ema hotu ne’ebé adere ba Jezús nia proposta salvasaun nian.

Leitura dahuluk hatudu oinsá tenke konkretiza podér “xave sira-nian”. Ema ne’ebé kaer “xave sira” labele uza ninia autoridade atu konkretiza interese pesoál sira no atu impede nia maluk sira ba asesu soin rohan-laek nian; maibé tenke ezerse servisu nu’udar aman ida ne’ebé buka nia oan sira nia di’ak, ho delikadeza, ho domin no ho justisa.

Leitura daruak mak konvite ida atu kontempla Maromak nia rikusoin, sabedoria no siénsia ne’ebé, ho forma misterioza no dalaruma oinseluk husi ema nia hanoin, realiza ninia projetu salvasaun ba ema. Ema presiza de’it entrega an ho konfiansa ba Maromak nia liman no husik atu ninia admirasaun, rekoñesimentu no adorasaun nakfilak iha knananuk domin no hahí nian ba Maromak makso’ik no libertadór.

Download