Iha dia 29 de Julho delegasaun husi Timor Leste kompostu husi Diocese 3 iha Timor laran: Baucau, Dili no Maliana sai husi Dili hodi ba Bali. Entre membru delegasaun sira ne’e iha 23 pesoas husi Movimentu Juvenil salesiano/MJS, ne’ebe akompana husi Madre Floriana Guterres,FMA., delegada Nasional PJ-FMA, Pe. Alarico sarmento,SDB, Responsavel MJS nasional nivel SDB no Sr.Angelita Gomes,FMA., Ikipa PJ-FMA. Bainhira too iha Bali delegasaun ne’e fahe ba grupu boot rua: ida ba Diocese Bandung no ida seluk ba Diocese Surabaya. Hahu loron 29 Julho- 1 de Agosto. Esperiensia iha DID (Days in Diocese), furak tebes tanba familia ida-idak simu membru nain 2 ka 3 husi nasaun la hanesan. Tuir Amu Bispo Diocese Surabaya Mgr. Fransiskus, katak familia sira ne’e mos halo formasaun ba preparasaun atu simu bainaka foinsa’e sira husi nasaun seluk. Sira nia preparasaun konaba multikultural ne’ebe quase tinan 2 nia laran. Iha avaliasaun ikus ho delegasaun Timor sira hotu haksolok ho familia sira nia ospitalidade, laran-luak, senti familia boot iha Kristu. OMK (Orang muda katolik) husi Diocese sira iha preparasaun masimu ba eventu ida ne’e. Foinsa’e sira ne’e mak organiza buat hotu hahu iha aktividades Parokia, Diocese no too ami ba Yogyakarta, fatin eventu AYD7. Iha aktividades Diocese nian, ami esperiensia atu tama iha kultura fatin ida-idak nian no aprende hahan no moris ho pacifiku ho ema ne’ebe iha relijiaun seluk. Foinsa’e katolika Indonesia nakonu ho moris, entusiazmu, kreativu, laran diak, metin iha sira nia fiar sarani Katolika nian.

Iha loron 2 Agostu delegasaun sira hotu ne’ebe namkari iha Diocese 11 ba hamutuk iha Yogyakarta partikularmente iha Jogja Expo Centre (JEC). Programa ne’ebe iha JEC mak hanesan tuir mai ne’e:

1. Benvinda no getting to know each other ho foinsa’e sira husi 24 nasoens ho danza kultural Saman dansa tipiku Semarang Indonesia.
2. Sharing esperiensia DID moris hamutuk ho familia ka live-in durante loron rua to’o tolu. Sharing esperiensia ba loron dahuluk nian hahú ho foinsae sira husi Sud Est Asia.
3. Santa Misa no Solene abertura husi Mgr Ignatius Suharyo nudar selebrante no konselebrante bispo no amululik kuase nain atus ida. Mgr rekomenda ba foin sae sira “atu haksolok nafatin. Ohin ita halibur, ita mai husi nasaun kultura no istoria lahanesan, ita hotu mai hamutuk atu selebra ita nia ksolok. Jesus hadomi imi, kreda hadomi imi tau matan ba imi atu sai boot”.
4. Cultural performanse hodi konklui loron dahuluk. Autoridades prezente mak Ministro Relijiaun Indonesia nian Lukman Hakim Siafuddin inklui governadór Jogjakarta no autoridade selseluk tan.

Taka atividade loron dahuluk nian, oras tuku 22.00.

 

• Iha loron daruak nian: iha seksaun konaba Oinsa Fiar Katoliku tama iha Yogyakarta hafoin iha country Exhibit.
• Loron datolu: Dader too 6pm iha “Exposure” halo esperiensia iha area remota konaba kultura, hahan no istilu moris nian; adorasaun no konfesaun
• Loron dahaat: (AM) pleanariu ho Bispo Joel Z.Baylon The Asian Catholic youth today: Realities and challenges; (PM) workshop ho tema 15 diferente (partesipantes sira fahe tuir grupu no workshop halo iha tempu hanesan) tema sira mak hanesan: Nurturing the trafficked mother earth, youth and social problem:corruption, youth’s creativity in proclaiming the Gospel,  youth and social problem: drugs, youth and social problem: casual-sex dating, abortion; how to be witness of christ in a multicultural context; youth in the emerging churches of Asia; young catholic enterpreuneur; social media: threat or opportunity.
• Loron dalima: tema: Living and sharing the joy of the Gospel. Misa enceramentu iha Akademia Militar Angkatan Udara Yogyakarta.

Ha’u hanoin la’os ami ne’ebe akompana mak hakerek konaba esperiensia furak Asian Youth Day 7 nian. Maibe hau hakarak husik foinsa’e sira ne’ebe halo esperiensia direitamente ho eventu boot ida ne’e atu fahe sira nia esperiensia. Madre Flory, prepara mos perguntas ruma atu sira fahe. Perguntas sira ne’e mak hanesan:

1). Esperiensia ida ne’ebe furak liu iha AYD.       

 2). Sentimento saida husi evento nee.                 

3). Haree husi experiensia sira nee saida mak ó sei halo ba ò nia grupu MJS no iha o nia moris loro-loron.

• ✌Esperensia nebe furak liu iha AYD7, diak tebes mai hau tamba iha oportunidade atu hasoru malu ho kolega sira seluk husi Nasaun sira, maske Diferensia iha ita nia linguagen maibe ho Maromak nia presensa iha ita leet, ita bele halao knaar hirak nee ho diak, buat nee halo hau orgulho tebes mak wainhira joven sra haksolok hamutuk hodi fahe Esperensia ba malu, buat nebe hau sente mak wainhira ita Tur hamutuk ho joven sira nebe mai husi Nasaun seluk no sira fahe sira nia esperensia nebe furak tebes, no sira mos koko atu rona wainhira ita sharing, husi Esperensia hirak nee hau Nudar Joven ida hau sei haklean hau nia esperensia hirak nee iha hau nia Dioseze no hau nia paroquia, nudar MJS ida hau iha hakarak tomak atu fahe hau nia espriensia tomak ba Joven no labarik sira, no serbisu hamutuk ho kreda sei dada no atrai joven sra, no koko atu bok joven sra nebe dukur no joven sira nebe lao lakon. Liu husi eventu hirak nee hau Agradese tebes ba Madre Flory, Madre Lita ho Padre Alarico nebe akompana ami durante viajen tomak no aktividades (CelDy R.).

 

• Hau sente kontente liu tamba hau bele aprende oinsa moris iha toleransia nia laran no liu-liu hau bele aprende familia katolika nia moris lolos ne oinsa? No buat nebe hau orgulho liu mak belun sira iha Kulonprogo bele haklaken kona ba Kristu liu husi sira kultura. Nune hau hanoin iha Grupo MJS ita presija dada foinsae sira liu husi aktividade nebe ita kria no sebele ita promove ita nia kultura sira atu bele halibur ita nia belun foinsae sira.  (Olga)

 

• Esperiensia sira hotu iha AYD  mai hau  buat nebe extraordinario  liu tamba buat nebe bele halo ita hasoru malu. Hodi fahe esperiensia sira ba malu kona ba ida idak nia parokia  no diocese  no mos ho  familia sira nebe ita hela ba …….no ida seluk mak tau liu iha hau nia fuan mak Laos ho religiao katolika deit maibe ho ema muslim sira ne dehan katak hatudu momos  ita nia amizade metin hodi  hatudu katak ita maske  relijiaun  ketak ketak maibe ida deit  iha Nai Maromak. Nee mak buat  nebe hau hetan iha AYD. (2)sentimento nebe hau sente iha AYD  mak sentimento domin  nebe sira halo no fo liu husi sira nia hahalok servisu  no rona malu hodi simu  ita hotu nebe husi nasaun hirak husi Asia  no diocese sira la sente kole hodi atende ita nia necesidade. (3) husi esperiensia sira ne  fo hanoin mai ita katak la halo diferensia ba ema seluk ne mak ita tenki halo iha ita nia grupo rona no simu  buat hotu. Ne mak dudu makas iha hau nia sentimento ne mak  buat nebe hau tenki halo iha hau nia moris dala barak la hatene  rona   no  simu ema seluk karik  buka atu simu  no rona. (Romaldo)

 

• Sentimentu nebe hau sente iha eventu AYD mak, hau bele sente Maromak nia domin liu husi sharing sira hamutuk ho maluk sira husi nasaun seluk, liu husi ne’e halo hau haklean liu tan hau nia fiar, halo hau besik liu tan ba Maromak.Buat nebe ^hau sente no hetan, hau sei hakaas an atu fahe fila fali ba hau nia kolega sira seluk liu2 iha (Carmelita)
• Sentimento nebe hau hetan mak hau bele hasoru Jesus Maski la hasoru Maibe Bele hare Jesus Liu husi Kolega Sira nebe partisipa iha AYD7 ne hau sei hakas an Nafatin atu Haklaken Kona ba Jesus ba hau nia Rai dobenTimor Lorosae Liu2 iha MJS. (Amanto)

 

• Esperiensia nebe furak liu iha AYD wainhira iha momentu DID (Days in Diocese), Ijame de konsiensi no Sharing, momentu hirak ne’e ajuda hau atu bele fila fali ba Maromak. Hosi eventu ida hau bele renova fali hau nia fiar nudar ema katoliku nebe dia Hau sei fahe ba kolega sira seluk liu husi saida deit no hau hakas an atu sai maduru liu tan iha hau nia moris lor-loron nian. (Afonso Alves)

 

• Mai ha’u esperiensia Asian Youth Day furak tebes, tanba nasaun Asia mak nasaun ida ne’ebe dinamiku liu no moris iha multikulturalismu, sira bele hariku malu. Hau haksolok no agradese tanba fo mai hau presente ida furak mak Fiar sarani Katoliku, fiar iha Jesus Kristu ne’ebe bolu ita sai familia ida deit hodi Nia naran. Foinsa’e barak ne’ebe sharing ho hau dehan “ I thank God for beeing a Catholic person, we are just a family”. Fiar ida ne’e la’os mamuk deit maibe fiar ne’ebe moris, nakonu ho ksolok domin no fraternidade. Buat furak ida tan ne’ebe hau esperiensia mak hodi haree ba OMK (Orang muda katolik) Indonesia hadomi Kreda katoliku no fo an ba Kreda nia diak no liuliu aktividades hotu durante AYD7 hahu iha Diocese too iha eventu boot iha Yogyakarta. Joven sira ne’e iha komitmentu atu serbi ema seluk hodi la hein ema atu selu sira. Sira mak organiza buat hotu. Hau espera katak Timor oan sira ne’ebe partesipa iha eventu ne’e aprende buat ruma husi OMK Indonesia hodi la hein padre ka madre sira mak organiza maibe bele halo mesak no padre no madre sira iha kotuk atu suporta deit.

 

(Sr.Angelita)