Maun no biin-alin sira, bondia!

Ohin pájina Evanjellu nian (Mt 14,22-33) deskreve epozódiu Jezús nian ne’ebé, depoizde harohan kalan tomak iha tasi Galileia nia ibun, nia dirije bá ro’o ho ninia dixípulu sira, hodi la’o iha bee leten. Roo iha hela tasi klaran, tan anin forte ida mak bloka. Bainhira sira haree Jezús bá hasoru sira hodi la’o iha bee leten, dixípulu sira hanoin katka nia espíritu ida no sira sai ta’uk. Maibé nia asegura sira: «Aten-barani bá, ha’u mak ne’e, imi keta ta’uk!» (v. 27). Pedro, ho ninia impulsu baibain nian, dehan ba Nia: «Na’i, se Ita karik, haruka ha’u bá hasoru Ita iha bee leten»; no Jezús bolu nia «Mai!» (vv. 28-29). Pedro tun husi roo no hahú la’o iha bee leten bá hasoru Jezús; maibé tanba anin nia nakdedar no hahú mout. Nune’e nia hakilar: «Na’i, salva ha’u!», no Jezús lolo liman no kaer metin nia (vv. 30-31).

Evanjellu nia narrasaun ida-ne’e soi simbolizmu riku ida no halo ita reflete kona-ba ita-nia fiar, nu’udar individuu, nune’e mós nu’udar komunidade ekleziál, ita hotu ne’ebé iha ne’e nia fiar m, ohin, iha Prasa ida-ne’e. Komunidade, komunidade ekleziál ida-ne’e, iha fiar? Oinsá ita ida-idak nia fiar no ita-nia komunidade nia fiar? Roo mak ita ida-idak nia moris maibé mós Kreda nia moris; anin kontráriu reprezenta difikuldade no provasaun sira. Pedro nia invokasaun: «Na’i, haruka ha’u bá hasoru Ita!» no ninia hakilar: «Na’i, salva ha’u!» hanesan kedas ho ita-nia hakaran atu sente Na’i ninia prosimidade, maibé mós ta’uk no laran lahakmatek ne’ebé akompaña momentu susar liu ita-nia moris nian no ita-nia komnidade nian, marka ho frajilidade interna n sir ano difikuldade esterna sira.

Ba Pedro, iha momentu ne’eb’a, la to’o Jezús nia liafuan ne’ebé asegura, hanesan tali ne’ebé iha atu kaer metin hodi enfrenta bee ne’ebé la habelun no siak maka’as. Ne’e mak buat ne’ebé bele akontese mós ho ita. Bainhira ita la kaer metin Na’i nia liafuan, atu iha seguransa liután ita ba konsulta oroskópiu sira no matan-dook sira, no hahú mout kle’an. Ne’e signifika katak fiar ladún forte. Evanjellu ohin nian fó hanoin mai ita katak fiar iha Na’i no iha Ninia liafuan loke dalan ida fasil no hakmatek tebes; Nia la hasai ita husi tempestade moris nian. Fiar fó mai ita seguransa Prezensa ida nian, Jezús nia prezensa ne’ebé dudu ita atu supera tempestade ezistensiál sira, serteza kona-ba liman ida ne’ebé kaer metin ita atu tulun ita enfrenta difikuldade sira, hodi hatudu lurón ida, bainhira nakukun mós. Fiar, la’ós dalan ida atu eskapa husi problema sira moris nian, maibé tahan ita iha dalan no fó sentidu ida ba nia.

Epizódiu ne’e mak imajen furak ida kona-ba Kreda tempuhotu nia realidade: roo ida ne’ebé, iha ninia pasajen tenke enfrenta mós anin kontráriu no tempestade sira, ne’ebé ameas atu halo nia taka fila. Buat ne’ebé salva nia la’ós ninia emar sira nia aten-barani no kualidade sira: garantia kontra naufrájiu mak fiar iha Kristu no ninia liafuan. Ida-ne’e mak garantia: fiar iha Jezús no ninia liafuan. Iha roo ne’e ita seguru, maski ita ho ita-nia mizéria no frakeza sira, liuliu bainhira iha tuku tur no adora Na’i, hanesan dixípulu sira nepebé, ikusmai, «hakneak iha nia oin, hodi dehan: “Tebes duni Ita mak Maromak nia Oan!”» (v. 33). Furak atu dehan liafuan ne’e ba Jezús: “Tebes duni Ita mak Maromak nia Oan!”. Ita hotu dehan hamutuk? “Tebes duni Ita mak Maromak nia Oan!”.

Virjen Maria tulun ita atu hela metin iha fiar atu reziste tempestade sira moris nian, atu horik iha Kreda nia roo hodi proteje an husi tentasaun atu sae roo sira ne’ebé babeur ita maibé inseguru ho ideolojia sira, moda sira no slogan sira.