9 Agostu

Santa Teresa Benedita da Cruz mak “Patrona ida Europa” nian.

Santa ne’e nia naran mak Santa Edith Stein. Amu Papa João Paulo II beatifika nia iha 1 Maiu 1987, no kanoniza liutiha tinan 11, iha 11 Outubru 1998.

Nia inan-aman judeu, bainhira nia sai foin-sa’e nia lakon fiar. Ho ninia estudu badinas dedika ba filozofia iha Universidade Breslau nian, iha tinan 1921, Edith ba vizita kazál ida ne’ebé konverte an ba Evanjellu. Iha biblioteka uma nian nia hetan autobiografia Santa Teresa de Ávila. Edith lee livru ne’e kalan tomak. “Bainhira ha’u taka livru ne’e, ha’u hateten mai ha’u-nia an rasik” ida-ne’e lia-loos”, nia deklara ikus mai.

Iha Janeiru 1922, Stein simu batizmu no iha loron 2 Fevereiru tinan ne’e nia simu krizma husi Bispu Espira nian. Iha 1932, nia simu ‘cátedra’ iha instituisaun katólika ida, iha-ne’ebé nia dezenvolve  ninia antropolojia rasik, hodi hetan maneira atu tau hamutuk siénsia no fiar. Iha 14 Outubru 1933 nia tama iha Mosteiru Carmelita sira Colônia nian, no hili naran Teresa Benedita da Cruz. Depoizde tinan lima nia halo profisaun perpétua. Husi Alemanha, Edith hetan transferénsia ba Holanda hamutuk ho nia biin Rosa, ne’ebé simu mós batizmu iha Igreja Katólika no servisu iha Konventu. Iha períodu ne’e rejime nazista mak ukun no tanba Bispu Katóliku sira halo komunikadu ida kontra judeu sira nia deportasaun, entaun Gestapo mai invade Konventu Holanda nian no prende Edith no nia biin. Sira lori biin-alin na’in rua ne’e ba kampu konsentrasaun iha Westerbork. Iha 7 Agostu, Edith ba Auschwitz, hamutuk ho nia biin no judeu  na’in 985. Ikusmai iha 9 Agostu, Irmán Teresa Benedita da Cruz, hamutuk ho nia biin Rosa, mate iha kámara gás nian no nazista sira sunu sira-nia isin. Nune’e, liuhusi martíriu, Santa Teresa Benedita da Cruz, simu koroa glória eterna iha Lalehan.

Nia loron festa nian mak 9 Agostu.

Santa Teresa Benedita da Cruz, harohan mai ami!