Sidade Vaticano – “Ita tenke rona liután ita-nia konxiénsia. Kuidadu, ne’e la signifika ita atenke tuir ita-nia ego, halo buat ne’ebé interesa ita, buat ne’ebé ita hakarak, buat hotu ne’ebé ita gosta…” , Papa Francisco hateten ba peregrinu rihun ba rihun halibur iha Prasa S. Pedro durante Angelus.

Amu-Papa nia liafuan hetan inspirasaun husi Evanjellu ohin nian (Lc 9,51-62), ne’ebé hatudu Jezús “foti desizaun firme atu la’o ba Jerusalém” hodi “kompleta ninia misaun salvasaun”.

 

“Husi momentu ne’ebá”, Amu-Papa hatutan, “liutiha desizaun firme, Jezús la’o ba oin to’o rohan. Ba ema sira ne’ebé husu se sira bele tuir Nia, nia dehan momoos ba sira sá de’it kondisaun sira: la iha horik-fatin permanente; haketak an husi afetu umanu sira, no monu ba nostaljia tempu uluk nain”.

“Maibé Jezús mós dehan ba nia eskolante sira, ne’ebé simu knaar atu bá uluk nia atu haklaken molok nia to’o, atu keta impoin buat ida. Se sira la hetan ema ne’ebé hakarak simu nia, sira tenke kontinua ba oin, la’o ba oin”.

Ko’alia ad-lib, Amu-Papa dehan, “Jezús haraik an; nia nunka impoin. Se imi hakarak, tuir Nia; Nia nunka impoin”.

“Buat sira ne’e hotu halo ita hanoin. Buat ne’e hateten mai ita, nu’udar ezemplu, importánsia ne’ebé konxiénsia iha, ba Jezús mós: rona iha ida-idak nia fuan Aman nia lian no tuir nia. Jezús iha nia moris iha rai, la’ós, nu’udar modu atu hateten, ‘tele-komandu’ nian. Nia mak Liafuan halo an ba ema, Maromak nia Oan sai ema, no iha pontu ida foti desizaun atu sa’e ba Jerusalém, ba dala ikus; desizaun halo ho konxiénsia, la’ós mesak maibé hamutuk ho Aman, iha uniaun tomak ho Nia!  Nia deside iha obediénsia ba Aman, iha sintonia kle’an no rona ninia hakaran. Ba razaun ne’e, nia desizaun firme basá nia halo hamutuk ho Aman. No iha Aman, Jezús hetan kbiit no roman ba ninia dalan”.

“No Jezús”, Papa Francisco hateten ad-lib, ” mak ema livre. Iha ninia diálogu ho Aman, nia livre. Jezús lakohi sarani sira ne’ebé la livre, ne’ebé la ko’alia ho Maromak ka ‘tele-komandu’. Se sarani la hatene ko’alia ho Maromak, nia la livre”.

“Nune’e ita tenke rona liután ita-nia konxiénsia, Kuidadu, ida-ne’e la signifika ita tenke tuir ita-nia ego, halo buat ne’ebé interesa ita, buat ne’ebé ita hakarak, buat hotu ne’ebé ita gosta. Ida-ne’e la’ós konxiénsia. Konxiénsia mak espasu interiór iha-ne’ebé ita bele rona lialoos, buat di’ak, Maromak nia lian. Iha espasu interiór ita-nia relasaun ho Nia, ne’ebé ko’alia ba ita-nia fuan no tulun ita dixerne, komprende dalan ne’ebé ita tenke foti, no bainhira foti ona desizaun, ita la’o ba oin, no sai fiél”.

Nu’udar ezemplu obediénsia nian ba Maromak no ba konxiénsia, Papa Francisco temi sasin espesiál, “ezemplu furak”, Amu-Papa Bento XVI”, naran ne’ebé bainhira nia temi, ema hotu basa liman maka’as.

“Papa Bento XVI”, Francisco subliña, “fó ezemplu boot kona-ba ne’e. BainhiraNna’i halo klaru ba nia, iha orasaun, sá loos ain-hakat nia tenke foti, nia halo tuir, ho sentidu boot dixernimentu no aten-barani nian, ninia konxiénsia, katak, Maromak nia hakaran ne’ebé ko’alia ba nia fuan no ezemplu ita-na aman nian ne’e halo di’ak maka’as mai ita hotu, nu’udar ezemplu ida atu tuir”.

“Ita Na’i-Feto”, nia hateten iha konkluzaun, “ho simplisidade boot, rona no medita kle’an iha nia an rasik Maromak nia Liafuan no sá mak akontese ba Jezús. Nia tuir nia oan ho konviksaun kle’an no esperansa firme. Atu Maria tulun ita sai ba beibeik, mane no feto sira konxiénsia livre nian iha ita-nia konxiénsia, akontese diálogu ho Maromak, tanba iha konxiénsia laran mak ema bele rona Maromak nia lian no tuir ho desizaun”.