Dili – Husi loron 29-30 Juñu, PT Sriboga Flour Mill hala’o treinamentu panifikasaun iha Mazzarello Bakery.

Sira ne’ebé tuir treinamentu mak Mazzarello Bakery, Wilton Bakery, paderia husi Taibesi, Surik Mas, nst, hamutuk ema besik na’in ruanulu.

Treinamentu nia objetivu mak introdús tipu trigu oioin ne’ebé empreza Sriboga prodús hanesan: “double zero” uza ba french bread, bugget nst; “hime” uza ba slice bread no bakpao; “beruang biru” ba paun baibain no trigu oin hitu tan ne’ebé la uza atu hodi halo demonstrasaun.

 

Durante loron rua ne’e, sira uza ekipamentu no fasilidade Mazzarello bakery nian ba trenu ne’e. Reseita sira ne’ebé iha loron rua ne’e uza ba treinu no demonstrasaun mak “croissant, french bread, buggette, roti manis, muffin, puff pastry, bakpao no basic brownies”. Technical advisor husi Sriboga ne’ebé halo treinu mak señór Deni Panca Sulistio.

Empregadu sira Sriboga nian hakfodak haree katak Mazzarello Bakery nia staff isin ki’ik maibé serbisu iha panifikasaun, enkuantu baibain ema isin boot mak baibain halo serbisu sira-ne’e iha bakery seluk. Sira mós haree katak pesoál sira iha duni hakaran atu aprende no badinas.