Dili – Loron 5 Agostu mak loron fundasaun Institutu FMA Nian. Ba dala uluk Irmán Maria Mazzarello no nia maluk na’in 10 saran an ba Maromak iha Don Bosco nia liman, no iha tempu ne’ebá nia entrega Konstituisaun FMA nian, ne’ebé nia rasik mak hakerek. Hanoin fali loron ida-ne’e, katak hanoin fali konsagrasaun rasik, bainhira ita FMA ida-idak iha profisaun simu Konstituisaun, nu’udar ninia projetu moris rasik.

Depoizde tinan 2 edisaun foun sai, Inspetoria FMA TIN, konsege mós imprime Konstituisaun sira ne’ebé hafoun iha Kapítulu Jerál 23 liubá, iha lian rua, italianu-tetun, no entrega ba komunidade ida-idak. Selebrasaun entrega Konstituisaun renovada ne’e, halo iha selebrasaun simples maibé kle’an ida nia laran, iha jardín uma inspetoriál, iha Na’i-Feto nia oin.

Iha selebrasaun orasaun loraik nian, Ir Alma Castagna, inspetora FMA TIN, molok entrega Konstituisaun ba reprezentante sira komunidade ida-idak nian, haree ba livru nia tamañu neebé boot uitoan, halo kedas komparasaun ho fatuk-belar sira Lei nian ne’ebé Moisés entrega ba Povu. Nia hateten katak “bainhira entrega ukun-fuan sanulu iha fatuk-belar, povu la halerik katak todan. Livru ne’e boot tanba iha lian rua, no mós kompleta ho regulamentu no apéndise sira”.

Nia agradese ba ema sira ne’ebé iha empeñu atu tradús no korrije Konstituisaun ne’e to’o rohan. Ita agradese Maromak ba don Konstituisaun nian no ba FMA sira, sai okaziaun ida atu hafoun iha ksolok vokasaun no paixaun da mihi animas cetera tolle, ita-nia aliansa domin nian ho Kristu ita-nia espozu, hodi moris tuir ho fidelidade ita-nia regra moris nian.

Konstituisaun  edisaun renovada 2015 mak rezultadu husi dalan naruk renovasaun vitál ne’ebé Kapítulu Jerál 22 husu ba Institutu FMA no konsege remata iha Kapítulu Jeral 23.