Dili – Na’i-Feto Peregrina kontinua nia vizita iha komunidade sira. Ohin, 29 Juñu, Na’i-Feto husik Kailaku hodi mai fali Dili no bá vizita komunidade Balide. Peregrinasaun ne’e hala’o atu komemora tinan 25 prezensa FMA nian iha Timor-Leste ne’ebé nia tutun sei selebra iha fulan Outubru 2013, nu’udar agradesimentu ba Na’i-Feto nia tulun no prezensa iha tinan hirak ne’e.

Nia sai husi Kailaku tuku 12 akompaña husi irmán Marivic no irmán Ernestina hamutuk ho estudente Kristál lubuk ida, no to’o iha Dili tuku lima resin. Foin-sa’e sira, oratorianu, animadór, estudente sira kursu komputadór no sarani barak husi parókia Balide no besi-besik halibur iha Matadouro atu simu Na’i-Feto. Hafoin sira lori hodi halo prosisaun to’o komunidade Balide.

To’o iha Balide, kontinua ho selebrasaun eukarístika ne’ebé padre Transfiguração SDB mak prezide. Iha ninia omilia, komenta leitura Evanjellu nian kona-ba milagre iha festa kazamentu iha Kaná, padre Transfiguração hateten katak Na’i-Feto nafatin hela iha famíia laran, maski la konvida nia karik bá. Nia iha-ne’ebá nu’udar Inan no haree ema hotu nia presiza hodi lori ba Jezús. Tuir Padre Trans, Na’i-Feto nia prezensa haree falta tua iha família laran. “Tua signifika ksolok, moris, matenek:, nia hatutan. Maria mak lori ita ba ksolok ni ahun, matenek ni ahun, moris nia hun. Maibé nia hateten: “Halo tuir buat ne’ebé Nia dehan”. “Se ita hakarak hetan ksolok, matenek no moris, ita tenke halo tuir Jezús nia Liafuan”, padre Trans hateten.

Misa remata tiha, grupu balun ba venera Na’i-Feto hodi rein.Na’i-Feto sei hela ba loron sanulu, husi ohin to’o loron 14 Jullu, nune’e hotu-hotu sei iha oportunidade atu mai kumprimenta nia no husu nia tulun.