Maun no biin-alin sira, bondia!

 

Iha domingu ida-ne’e, liturjia selebra festa Transfigurasaun Na’i nian. Pájina evanjélika ohin nian konta katak apóstolu Pedro, Tiago no João sai sasin ba eventu estraordináriu ida-ne’e. Jezús lori sira ho nia «no lori sira ketak, iha foho aas ida» (Mt 17,1) no, bainhira harohan daudaun nia troka nia oin, no ninia hatais sira sai mutin hanesan roman. Nune’e mosu Moisés no Elias, no sira dada lia ho Nia. Iha pontu ida-ne’e, Pedro dehan ba Jezús: «Na’i, furak mai ita horik iha ne’e! Se ita hakarak, ha’u halo tenda tolu, ida ba ita, ida ba Moisés, ida ba Elias» (v. 4). Nia ladauk remata ko’alia, bainhira kalohan nabilan ida falun sira.

Eventu Transfigurasaun Na’i nian oferese mai ita mensajen ida esperansa nian – nune’e ita sei sai, ho Nia –: konvida ita atu hasoru Jezús, atu serví maun-alin sira.

Dixípulu sira-nia subida ba foho Tabor lori ita atu reflete importánsia hakore-an nian husi sasán mundu nian, atu halo dalan ida bá leten no kontempla Jezús. Ne’e katak dispoin ita-nia an iha raronak atentu no orante ba Kristu, Aman nia Oan-mane doben, hodi buka momentu sira orasaun nian ne’ebé permite akollimentu ho laran midar no iha ksolok ba Maromak nia Liafuan. Iha subida espirituál ida-ne’e, iha hakore-an husi sasán mundu nian ida-ne’e, ita simu bolun atu deskobre hikas fali silénsiu ne’ebé fó h akmatek no fó kbiit foun mai husi meditasaun Evanjellu nian, husi leitura Bíblia nian, ne’ebé lori ita ba objetivu ida riku ho fafurak, glória no ksolok. No bainhira ita tau an nune’e, ho Bíblia iha liman, iha silénsiu, ita hahú sente beleza interiór ida-ne’e, ksolok ne’ebé halo moris Maromak nia Liafuan iha ita. Iha perspetiva ida-ne’e, tempu bailoron mak momentu providensiál atu haboot ita-nia empeñu babukak nian no enkontru nian ho Na’i. Iha períodu ida-ne’e, estudente sira livre husi empeñu eskola nian no família barak halo sira-nia férias; importante atu iha periíodu deskansu nian no hakore-an nian husi okupasaun loroloron nian, bele fó hikas forsa isin no espíritu nian, hodi hakle’an dalan espirituál.

Iha esperiénsia Transfigurasaun furak nia rohan, dixípulu sira tun husi foho (kf v. 9) ho matan no fuan ne’ebé nakfilak husi enkontru ho Na’i. Ne’e mak dalan ne’ebé ita mós bele halo. Ita la deskobre de’it Jezús maibé lori ita atu “tun husi foho”, nakonu ho Espíritu divinu nia forsa, atu deside ain-hakat foun sira konversaun nian no atu fó sasin konstantemente karidade, nu’udar lei moris loroloron nian. Nakfilak an husi Kristu nia prezensa no husi nia Liafuan nia ardor, ita sai sinál konkretu Maromak nia domin ne’ebé moris ba ita nia maun-alin sira hotu, liuliu ba sira ne’ebé terus, ba sira ne’ebé horik mesak no iha abandonu, ba ema moras sira no ba mane no feto lubuk ida ne’ebé, iha parte oioin mundu nian,  injustisa, kbiit-na’in no violénsia hatun sira.

Iha Transfigurasaun ita rona Aman lalehan nia lian ne’ebé dehan: «Ne’e mak ha’u-nia Oan-Mane doben liu. Rona nia bá!» (v.5). Ita hateke ba Maria, Virjen raronak nian, sempre pronta atu akolle iha fuan Oan-mane divinu nia liafuan hotu (kf Lc 1, 51). Atu ita-nia Inan no Maromak nia Inan tulun ita tama iha sintonia ho Maromak nia Liafuan, atu nune’e Kristu sai roman no gia ba ita-nia moris tomak. Ba Nia ita entrega ema hotu nia férias, atu bele sai hakmatek no fó benefísiu, maibé liuliu atu ema sira ne’ebé iha bailoron ne’e labele halo férias tanba impedimentu husi idade, husi motivu saude eh serbisu nian, husi difikuldade ekonómika sira eh problema seluk, atu sira maski nune’e sira hetan tempu ida ba deskansu, haksolok ho prezensa belun sira-nian no momentu ksolok nian.