Primeira Profisaun

Dili – Loron 5 Agostu mak loron fundasaun Institutu Filhas de Maria Auxiliadora (FMA) no fó hanoin hikas kona-ba Madre Mazzarello no Irmán na’in sanulu seluk ne’ebé adere ba Maromak nia projetu hatudu husi Don Bosco, atu harii Kongregasaun FMA. “Sin” dahuluk FMA dahuluk sira-ne’e nian halo tinan 145 liubá, ohin loron sei kontinua husi fet-raan laran-luak na’in lubuk ida ne’ebé mós hakarak sai hanesan sira hodi saran an ba Maromak no ba foin-sa’e sira.

Nune’e, mak ohin, iha Inspetoria Timor-Indonesia, Irmán foun rua barani dehan sira-nia “sin” ba dala uluk: Ir Fátima Martins no Irmán Domingas Pereira. Selebrasaun hahú horisehik ona ho orasaun entrega ábitu relijiozu ne’ebé Amululik Mário Sousa fó bensan, nu’udar marka esterna sira-nia konsagrasaun ba Maromak.

Selebrasaun eukarístika ba ritu primeira profisaun, hahú ho jestu simbóliku hasai hatais tuan, iha-ne’e hasai “tais” halo husi inan-aman molok entrada prosesionál. Irmán sira hili pasajen “Ha’u mak fihir imi hodi haruka imi bá atu fó fuan” (Jo 15,16) nu’udar sira-nia lema/motto. Nune’e, iha omilia, padre selebrante, Pe. Acácio dehan ba Irmán foun sira atu “Lee beibeik testu Evanjellu neebé imi hili nu’udar imi-nia empeñu. Ida-ne’e nu’udar resposta ba Maromak, liuliu bainhira iha tmepu nakukun, iha momentu krize nian”, hodi iha nafatin paixaun ba Maromak no ba foin-sa’e sira, instrumentu reál ninia domin nian ba foin-sa’e sira. Amu selebrante mós hateten katak “Primeiru votus la signifika halo tiha depois fila ba kotuk. Halo no la’o ba oin nafatin”. Nia taka omilia ho Ir salezianu misionário José Kusi nia resposta bainhira joven sira husu ba nia, “tan sá ita nunka hakarak fila bá ita-nia rain?”: “Ema ne’ebé tau ona ain, liman, tempu, oferese an ona atu serbisu iha Maromak nia to’os, keta koko atu fila ba kotuk”.

Irmán sira nia lia-menon

“Ha’u mak fihir imi hodi haruka imi bá atu fó fuan” (Jo 15,16)

Husi motto ida-ne’e, fó hanoin mai ami katak Maromak mak hili ami maski ami la soi, la’ós ami mak fihir Maromak.  Ami sai de’it instrumentu ida atu Nia uza hodi fó sasin no fó fuan barak no metin, maibé atu halo nune’e, ami presiza sadere no tau laran-metin nafatin ba Ida-ne’ebé bolu ami: Jezús no Maria. Ami agradese Institutu ne’ebé simu ami hodi halo ami-nia primeira profisaun.