Dili – Iha bolun no iha mandatu. Ne’e mak aspetu fundamentál rua iha sarani hotu nia moris, nune’e mós iha vida konsagrada. Maromak bolu ita atu tuir Nia, sai ninia dixípulu no ikusmai haruka mós sai ninia apóstolu, ninia misionáriu/a sira.

Depoizde semana ida horik iha Na’i nia foho santu (ilas fatin enkontru nian iha Retiru), oras-ne’e, partisipante sira retiru nian fila fali ba moris baibain; “hotu tiha Ezersísiu sira, oras-ne’e momentu atu halo ezersísiu iha moris loroloron nian”.

Iha tempu retiru ita halakan filafali ahi “Maromak nia domin nian”, “domin dahuluk” nian, “ita hateke ba an rasik  no ita haree saida mak ita prsiza hadi’ak atu serví duni Na’i iha misaun”.

Ad maiorem natus mak Maromak nia mehi mai ita, maibé sai boot iha lójika Evanjellu nian mak sai ema serví-na’in sira, tanba sira fó primadu ba Maromak, no hatudu profesia fraternidade nian.  FMA sira nia “maiorem” kuru husi Fundadór/a ninia espiritualidade, hanesan sira mós kuru husi Na’i Jezús rasik.

Nune’e mak, iha loron ualu Ezersísiu ne’ebé pregadór, Pe Mário Sousa SDB gia, lori atu ezersitande sira treinu fali kona-ba elementu sira espiritualidade saleziana nian: espiritualidade ida ho ai-riin tolu Sistema Preventivu nian, katak razaun, relijiaun no amorevolezza; espiritualidade ida prezensa nian iha foin-sa’e sira nia leet; espiritualidade mariana no eukarístika. Fila fali ba abut sira atu bele la’o filafali ho laran-manas liután, tuir Don Bosco no Madre Mazzarello nia ain-fatin, sira-nia laran-manas boot.

Loron sira-ne’e sai loron atu Na’i hakonu fali tua  paixaun nian ba Maromak no ba foin-sa’e sira nia salvasaun, liuhusi Maria Auxiliadora ninia intersesaun.

Loron ikus retiru nian, Irmán juniora na’in 19 hafoun hikas sira-nia profisaun, maibé la’ós ba sira de’it: ba Irmán perpétua mós, loron ba loron hatán ba Na’i nia bolun, ba foin-sa’e sira-nia bolun hodi halo sai sira nian, Don Bosco nia liafuan sira “Ba imi ha’u estuda, ba imi ha’u reza, ba imi ha’u serbisu, ba imi ha’u halimar, ba imi ha’u prontu atu saran ha’u-nia moris tomak”, axeze loron ba loron nian to’o iha “dada-iis” ikus nian, hanesan Don Bosco rasik halo: «Ha’u promete tiha ona ba Maromak katak to’o ha’u-nia iis ikus ba ha’u-nia foin-sa’e kiak sira» (MB XVIII 258).