Sidade Vaticano – Papa Francisco hasoru malu dadeer kuarta, 26 Juñu iha Prasa S. Pedro ho peregrinu sura-laek no sarani sira husi parte oioin mundu nian, ba Audiénsia Jerál.

Iha ninia katekeze semanál, Santu Padre reflete kona-ba tema: “Kreda: templu Espíritu Santu nian”. Defaktu, imajen ida ne’ebé hatudu mistériu Kreda nian mak Maromak nia Templu. Iha Testamentu Tuan, Templu ne’ebé Salomão harii mak fatin enkontru nian ho Maromak, basá iha ne’ebá mak rai Ai-baluk/Arka Aliansa nian, sinál Na’i nia prezensa iha nia povu nia leet.

[Asesu kópia ho lia-portugés]

Templu ne’e, mak prefigurasaun Kreda nian, ne’ebé Maromak nia uma loos, Amu-Papa hateten:

“Kreda mak Maromak nia Uma, fatin ninia prezensa nian, iha-ne’ebé ita bele hasoru Na’i; Kreda mak Templu iha-ne’ebé Espíritu Santu horik bá, ne’ebé anima, gia no tahan nia. Fatuk-inan Kreda nian mak Kristu no sarani hotu mak fatuk moris ba edifísiu espirituál ne’e”.

Espíritu Santu, ho nia don sira, hatudu rikusoin no variedade iha Kreda no nia mak halo ita hotu sai ida de’it, to’o harii templu espirituál ida, Iha konstrusaun ne’e ita la oferese sakrifísiu materiál sira, maibé oferese ita-nia an rasik, ita-nia moris.:

“Kreda mak Templu Espíritu Santu nian, iha ne’ebé Maromak atua; iha ne’ebé ita ida-idak, liuhusi don Batizmu nian, sai fatuk moris. Ne;e signifika katak iha Kreda, la iha ema ida inútil, la iha ema sekundáriu ka anónimu: ita hotu forma no harii Kreda”.

Maibé, ida-ne’e, halo ita reflete, Papa Francisco hateten, kona-ba realidade katak, se falta karik tijolu ita-nia moris sarani nian, falta buat ruma atu hafutar Kreda.

 

“Ema balun hateten: ‘Ah, ha’u ho Kreda lae, ha’u la tama iha nia!’ Maibé se falta tijolu ó-nia moris nian, iha Templu furak ne’e! […] Ita hotu tenke lori ba Kreda ita-nia moris, ita-nia fuan, ita-nia domin, ita-nia hanoin, ita-nia serbisu… Ita hotu hamutuk!”.

Nune’e, Amu-Papa husu atu ita loke an ba Espíritu Santu nia hahalok atu “sai parte ativa ita-nia komunidade sira-nian”, ita tenke sai “fatuk moris”, la’ós :fatuk ne’ebé kolen, baruk no indiferente”.

No nia konklui: :Ita husu Na’i nia grasa no kbiit, atu ita bele sai ida de’it ho Kristu, fatuk inan, ne’ebé sustenta ita-nia moris no Kreda tomak nia moris”.

Hotu tiha katekeze, Papa Francisco kumprimenta grupu oioin ne’ebé marka prezensa, iha lian oioin.

Ikusnian, Amu-Papa haraik ninia Bensan Apostólika.