Fiar trinitária. Retiru anuál ba novisa tinan dahuluk no postulante sira
Venilale – Ami hala’o ami nia Retiru Anual husi loron 17 Jullu to’o 24 Jullu iha Komunidade Maria Auxiliadora iha Venilale. Ami nia pregadór mak Padre José de Sá, SDB ne’ebé fahe reflesaun ho tema: FIAR TRINITÁRIA.
Fiar mak presente boot liu ne’ebé ita simu husi Maromak liu husi Ninia Kreda no fiar ida ne’e presisa mós atu habelar ba ema seluk: ema la sunu lakan lilin/ahi oan hodi tau iha okos, maibé ta’u iha ahi oan fatin atu leno ema hotu iha uma laran.
Ita nia nia Fiar sarani la’ós konseitu de’it ka buat ida ne’ebé astratu. Ita fiar Aman Maromak ne’ebé Jezús revela mai ita no tan ne’e Jezús mak sentru ba ita nia fiar. Ho fiar ne’ebé ita iha, ita haree mós asaun Espíritu Santu nian iha ita nia moris liu Nia dons hitu.
Ita mós aprende husi Maria oinsá atu sai fiar nain ne’ebé loos tamba Maria mak modelu fiar nian . Eukaristia mak Misteriu Fiar nian ne’ebé hakat aas liu ita nia neon no ida ne’e ita simu ho fiar de’it, hanesan Saun Cirilio dehan: “labele haree ba paun no tua elementu naturál de’it, tanba ita nia Na’i hateten loloos kedas sira ne’e Nia Isin no Nia Ran rasik.”Eukaristia mós sai hahan espiritual ba ita nia peregrinasaun ba Maromak.
Madre Cecilia mós fahe reflesaun ba ami kona ba Madre Mazzarello nia Fiar, ne’ebé simples no moris liu. Madre Mazzarello halo esperiénsia kona ba Maromak nia domin mizerikordiozu, moris Eukarístiku no laran metin ba Maria Ausiliadora. Maria Mazzarello nia fiar hatudu liuliu iha Karidade.
Ami mós hakarak atu fahe UKUNFUAN KARIDADE NIAN TUIR MADRE MAZZARELLO NIA EZEMPLU NO HANORIN.
UKUNFUAN KARIDADE NIAN TUIR MM NIA HANORIN NO EZEMPLU
- Hatais-an ho Jezus nia sentimentu sira.
- Deskobre Jezus nia presenza iha ema ida-idak hodi hare buat ne’ebé diak iha nia.
- Hatene simu ema ho nia frakeza no limiti no prontu atu perdua.
- Hatene valoriza /estima ema ida-idak nu’udar Maromak nia prezente no halo diak nafatin ba nia.
- Haluhan-an atu tau ema seluk nu’udar sentru.
- Delikadu iha liafuan , pasiénsia naruk no laran kmaus ne’ebé la sukat.
- Laran manas iha Na’I nia servisu.
- Laran sadia ba malu no koriji malu ho karidade nafatin.
- Hatene rona , komprende, no dialoga.
- Reza ba malu iha Jezus nia Futar Fuan
Obrigada barak ba orasaun. Ami halo didi’ak ami nia retiru.
Novisa Cesarina Joana Marques Correia
