Maun no biin-alin sira, bondia!

Pájina evanjélika ohin nian propoin ai-knanoik tolu ne’ebé Jezús uzaa tu ko’alia ba ema lubun boot kona-ba Maromak nia Reinu. Ha’u para iha ida uluk: ida fini di’ak no ida duut aat, ne’ebé hatudu problema buat aat nian iha mundu no hatudu sai Maromak nia pasiénsia (kf Mt 13,24-30.36-43). Oinsá Maromak nia pasiénsia boot liu! Mai ita ida-idak mós nia bele dehan ida-ne’e: “Oinsá Maromak nia pasiénsia boot liu mai ha’u!”. Istória ne’e akontese iha to’os ida ho protagonista opostu. Husi parte to’os-na’in ne’ebé reprezenta Maromak no kari fini di’ak; husi parte seluk inimigu ne’ebé reprezenta Satanás no kari du’ut aat.

Ho tempu ne’ebé liu, iha fini di’ak nia leet moris mós duut aat, no iha faktu ne’e nia oin to’os-na’in no atan sira iha atitude la hanesan. Atan sira hakarak intervein kedas hodi fokit sai duut aat; maibé to’os-na’in, ne’ebé preokupa liuliu ho fin inia salvasaun, nia ba kontra hodi dehan: «Keta halo, hodi fokit sai du’ut aat, imi fokit mós trigu» (v. 29). Ho ilas ida-ne’e, Jezús dehan mai ita katak iha mundu ida-ne’e di’ak no aat liga metin ba malu, nune’e imposivel, haketak no fokit sai buat aat hotu. Maromak de’it bele halo ida-ne’e, no nia sei halo iha juizu finál. Ho ninia ambiguidade no ninia karákter kompostu, situasaun prezente no kampu liberdade, to’os liberdade sarani nian, iha-ne’ebé hala’o ezersísiu dixernimentu nian entre di’ak no aat.

No iha to’os ne’e presiza tau hamutuk, ho konfiansa boot no iha providénsia, atitude rua ne’ebé kontra malu aparentemente: desizaun no pasiénsia. Desizaun mak ida hakarak sai fini di’ak – ita hotu hakarak –, ho kbiit tomak, no nune’e foti distánsia husi buat aat no ninia babeur sira. Pasiénsia signifika prefere Kreda ida ne’ebé sai fermentu iha massa, ne’ebé la ta’uk atu hafoer liman hodi fase nia oan sira nia hena, duké Kreda ida “puru” sira-nian, ne’ebé pretende atu julga molok tempu sira ne’ebé ho Maromak nia Reinu no sira ne’ebé lae.

Na’i, ne’ebé Matenek halo An ba ema, ohin tulun ita atu komprende katak di’ak eh aat ne’e ita labele identifika ho territória definidu eh grupu umanu determinadu: “Sira-ne’e mak di’ak, sira-ne’ebá aat”. Nia dehan mai ita katak liña fronteira entre di’ak eh aat liu iha ema ida-idak nia fuan, katak: Ita hotu ema maksalak. Ha’u hakarak husu ba imi: “Sé mak la’ós sala-na’in foti liman”. La iha ema ida! Tanba ita hotu nune’e, ita hotu sala-na’in. Jezús Kristu, ho ninia mate iha krús no ninia moris-hi’as, liberta ita husi sala nia atan no haraik mai ita grasa atu la’o iha moris foun; maibé ho Batizmu nia haraik mós Konfisaun, tanba ita presiza nafatin atu hetan perdaun husi ita-nia salan sira. Hateke nafatin no ba de’it aat ne’ebé iha li’ur husi ita, signifika lakohi rekoñese salan ne’ebé iha mós ita.

No hafoin Jezús mós hanorin ita modu oinseluk atu hateke ba to’os mundu nian, atu observa realidade. Ita simu bolun atu aprende Maromak nia tempu – ne’ebé la’ós ita-nia tempu – no mós Maromak nia “hateken”: hodi hein ho esperansa lori influénsia di’ak, atu du’ut aat eh hanesan du’ut aatm bele sai produtu di’ak. Ne’e mak realidade konversaun nian. Ne’e mak perspetiva esperansa nian!

Virjen Maria tulun ita atu kapta iha realidade ne’ebé hale’u ita la’ós de’it buat foer no aat, maibé mós buat di’ak no furak; atu hasai Satanás nia hahalok nia máskara sira, maibé liuliu atu konfia iha Maromka nia hahalok sira ne’ebé halo istória fó fuan.