Dili – Irmán na’in sanulu ne’ebé tuir kursu bienál juniora interkongregasionál 2013 remata ohin ho ezame no avaliasaun ba kursu. Irmán sira-ne’e husi kongregasaun FMA na’in neen, Concepcionista ida, Franciscana Futar Fuan Santu sira nian na’in rua, no Visitadora Franciscana ida.

Ba avaliasaun sira hatán ba pergunta haat: 1) Entre lisaun sira kursu nian tinan ida-ne’e, ida-ne’ebé mak difisil liu ka susar atu komprende? 2) Oinsá metodolojia iha kursu ida-idak? 3) Benefísiu sá mak kursu fó ba ha’u-nia kreximentu nu’udar ema konsagrada? 4) Sujestaun ruma atu halo di’ak liután.

 

Ba pergunta dahuluk irmán barak hateten katak lisaun Antropolojia filozófika mak  matéria ne’ebé sira hetan difikuldade, tanba sira la toman ho linguajen filozófika, la iha background filozofia nian. Balun iha metodolojia ensinu-aprendizajen ho razaun katak la iha rekursu iha uma atu halo TPC sira. Ba lisaun psikolojia vida konsagrada sira husu atu iha mós aprezentasaun ho ppt. Kona-ba istória la iha problema ida, tanba sira iha livru ho lia-tetun no lia-portugés.

Ba pergunta kona-ba metodolojia, sira sira husu atu iha matéria ruma bele envolve liután estudente ho diskusaun iha grupu, ho atividade interasaun atu lisaun la sai monótonu. Sira apresia metodolojia ne’ebé variada no envolve sira hodi tama mós iha internet. Balun rekoñese katak sira rasik mak ladún badinas atu hala’o sira-nia knaar eh tanba la organiza didi’ak tempu, eh tanba falta instrumentu no meiu sira, no mós ta’uk atu hatán sala ba pergunta sira dosente halo.

Ba pergunta kona-ba benefísiu, sira hotu hateten katak matéria sira haburas liután sira-nia koñesimentu an rasik nian no dixiplina nian no tulun sira atu buras iha vida espirituál no iha misaun ne’ebé sira hala’o. Sira aprende mós atu organiza tempu, sai responsavel atu hala’o knaar, haka’as an atu uza mós media komunikasaun nian hanesan komputadór no internet.

Kona-ba sujestaun sira mak atu uza lian ida de’it, katak tetun; atu hamenus serbisu sira ne’ebé halo iha uma; atu uza ppt no filmajen iha lisaun; lalika fó tpc tradús husi lian ida ba lian seluk; se bele fó kópia lisaun nian hotu tiha aprezentasaun ho ppt; envolve liután estudente iha aula; iha mós tempu ba konvíviu.

Ikusnian, sira agradese ba oportunidade no ba esforsu hotu husi parte dosente sira-nian no husu atu kontinua nafatin kursu ida-ne’e.