Dili – “Merenda escolar” sai sempre asuntu debate nian iha fatin-fatin liuliu iha eskola katólika sira, tanba hodi hanoin katak, inan aman sira iha responsabilidade máxima atu tau-matan ka fó-han oan sira molok mai eskola. Maibé iha parte seluk eskola nian, haree katak tebes duni, “merenda escolar” bele  mós ajuda uituan inan/aman sira. Hanesan esperiénsia eskola Maria Auxiliadora nian, kuaze 50% estudante sira wainhira mai eskola inan/aman sira sosa “nasi bungkus” besik eskola ba oan sira. Balun la han tan inan/aman sira fó de’it osan, no dala ruma inan/aman sira han hamutuk ho oan sira iha warung. Ne’e dehan katak “merenda escolar” iha eskola fó tulun mós liuliu iha parte ijiene no nutrisaun.

Nune’e ohin  loron 10 Jullu tinan 2017 mak loron primeiru estudante sira hahú fali merenda iha eskola depoizde fulan  neen (6) la hetan apoiu ida-ne’e.

Estudante sira husi Pre-escolar to’o ensino básico 1⁰ ano – 9⁰ ano ho haksolok tebes hodi  simu merenda.  Ementa ba loron primeiru  nian mak han foremungu ho susu-been. La’ós de’it alunu/a sira, maibé mós profesór/a sira, pesoál seluk no Irmán sira han hamutuk ho labarik sira iha sira nia aula ida-idak nia oin. Nune’e ami agradese ba  Governu hodi fornese “merenda escolar” mai ami eskola katólika sira. Obrigada.

(Grinalda da Costa)