Editoriál: Dixipuladu no Misionariedade

Iha nia vizita animasaun misionária nia, irmán Alaíde Deretti insiste maka’as kona-ba dimensaun misionária identidade FMA nian. Nia hateten katak Konstituisaun FMA nian ko’alia kona-ba ne’e iha artigu hamutuk 14 nia laran.

Maibé atu sai misionária, presiza tama iha eskola Mestre nian katak dixipuladu. Dixípulu mak aprendís Mestre nian no maktuir ninia dalan. Iha modu rua atu aprende ne’ebé lahanesan: ida, liuhusi relasaun prosimidade nian, empatia nian no místika nian ho Jezús; ida fali, liuhusi tatuir nu’udar dalan istóriku no esperiénsia moris iha mundu maibé la’ós mundu nian: “Dixípulu ne’ebé forma didi’ak sei sai hanesan Mestre”(Lc 6,40).

Ne’e dehan katak ita presiza tuir nafatin prosesu formasaun permanente iha-ne’ebé ita buka atu koñese sé mak Mestre no sé mak ita. Objetivu mak atu to’o ba konformasaun ho Mestre.

Atu ilustra dixipuladu no missionariedade, irmán Alaíde konvida ita atu foti atitude sira feto Samaritana nian no Samaritanu Di’ak nian. Presiza iha enkontru kle’an hodi kuru husi bee-matan atu bele haklaken ho konviksaun, no atitude Samaritanu nian ne’ebé sai maluk ba ema ne’ebé iha periferia ezisténsiál no sosiál.

Konvite ba ita FMA hotu atu iha paixaun boot liután ba Kristu no ba ema sira.