Dili – Konxiente ba tradisaun saleziana ne’ebé mak tinan-tinan hala’o iha komunidade katak tinan ida dala ida atu agradese malu, nune’e iha Oratoriu mós aplika sistema ida ne’e, tanba ne’e ohin loron 9 fulan Jullu 2017, labarik no joven hamutuk ho animadór sira selebra festa agradesimentu nian. Objetivu eduka labarik no foin-sa’e aprende hodi agradese uluk knana’in ba Maromak no ba ema ne’ebé fó sira-nia an hodi eduka sira, hahú husi aman-inan, animadora sira, no Irmán ida-ida.

Iha festa ne’e oratorianu sira mós konvida sira-nia aman inan hodi mai partesipa Santa Misa ne’ebé selebra husi Pe. Joaõ Boavida. Hotu tiha Santa Misa, oratorianu sira aprezenta sira-nia programa hanesan  dansa no kanta oinoin ba sira-nia aman-inan hafoin sira han hamutuk ho sira-nia aman-inan sira. Hahan simplis kontribuisaun husi aman-inan oratorianu sira nian. Haree katak aman-inan sira apresia tebetebes Irmán sira-nia servizu iha labarik no foin-sa’e sira-nia leet. Familia balun dehan katak sira mós prontu atu kolabora ho Irmán sira iha atividade saida de’it. Hotu tiha festa agradesimentu nian, familia sira oferese sira-nia kareta rua hodi lori fila fali Irmán sira mai iha komunidade tanba kalan ona.

Ida-ne’e esperiénsia premeira ne’ebé mak halo festa ho familia oratorianu sira nian, nune’e Irmán no animadóra sira mós kontente ba atividade ohin nian. Agradese ba ema ida-ida nia domin no kolaborasaun.

(Lucia Pereira)