Fuiloro – Loron  04 jullu mak nudar loron importante ba  ami nia  komunidade, Madre Morano Fuiluro. Loron ne’ebé ami selebra festa agradesementu, selebrasaun festa  ida ne’e partisipa husi komunidade Edukativa, menina sira no madre sira, ho totalidade 150 pessoas, atividade ba festa ida ne’e hahu hodi reza espesialmente ba Padre Salesiano sira, Lospalos no Fuiluro nian, ba trabalhadores sira, ba komunidade Edukativa, ba menina no ba madre ida-idak. Atividade  loron ne’e nian, loke ho selebrasaun Eukaristia ne’ebé prezide husi Padre Carlos, SDB no Diakono Venancio Fatima, SDB, iha lorokraik tuku 06.30 iha orasaun espesial, Servis praying ne’ebé prepara husi Madre Angelita. Intensaun husi orasaun ne’e hakarak agradese uluknanain ba Maromak ba diak no kmanek tomak ne’ebé ami simu, nu’udar familia ida iha razaun atu agradese ba buat diak hotu ne’ebé ami simu husi Na’i liu husi ema idak-idak partikularmente liu husi Madre Sebastiana ne’ebé nudar sentru uniaun nian komunidade.

Tema husi festa gratidaun ida ne’e mak : “ Nu’udar  Familia ho Ksolok ita agradese”. Tema ne’e ami hili bazeia ba reitor mor nia estreia tinan ida ne’e no ami nia esperiensia  virtude ne’ebé halao durante tinan ida ne’e. Tuir mai ita rona hamutuk deit menina no irman balun nia sentimentu no komentariu kona ba festa ne’e.

• Husi Elviana de Carvalho, menina ETA III^o ano, katak: “ Tuir ha’u nia  observasaun no esperiensia kona ba festa agradesementu komunidade nian ne’e  iha buat barak ne’ebé fo kor mai ha’u no halo ha’u sente kedas oinsa ita nia domin ba malu, no amizade ba malu iha komunidade nia laran, hahu husi dader ho orasaun laudes hamutuk hafoin misa hamutuk no mos reprezentante inan aman sira, halo ha’u sente kedas katak Maromak ne’e hadomi duni ha’u NIA fo domin mai ha’u liu husi ema oioin. Wainhira lokraik reza vésperas hamutuk , ha’u  nia kolega nain 7, lori fatuk hitu ba tau iha altar oin, fatuk ida-idak hakerek virtude ne’ebé la hanesan: dame, domin, amizade, pasiensia, positive thinking, respeita, iha parte ida ne’e ha’u gosta liu tamba iha fatuk ida-idak hakerek vertude diak sira, husi ne’e ha’u aprende katak ita hela hamutuk iha familia ida iha komunidade ida, ita tenke hatudu vertude hirak ne’e ba malu. No iha kalan wainhira han hamutuk no atraksi hamutuk, iha ne’ebé ami hatudu ami nia dansa sira, no ida ne’ebé furak liu ba ha’u mak iha kanta ikus nian “ Accendi la pace”,  nu’udar familia no komunidade ida, ita halakan lilin paz nian no forma hanesan uma ida no iha ne’ebá mak ha’u kontente liu maske ami mai husi fatin oioin maibe ami bele hari’i familia ida no uma ida.
• Husi menina : Almedina, menina kursu 2017: “ ba ha’u sente kontente tebes ho festa ida ne’e, tanba ne’e ba ha’u hanesan buat foun ida iha ha’u nia moris, foin primeira vez partisipa festa hanesan ne’e, nune’e ha’u haksolok liu, ha’u sente ha’u nia fuan nakonu ho domin no sentimentu gratidaun nian, liu-liu wainhira sai husi missa ema ida-idak dehan ba malu “ obrigada”. Ha’u agradese tebes, uluknanain ba Aman Maromak , ba madre no ha’u nia kolega sira, ba oportunidade no esperiensia furak ne’ebé ha’u hetan iha komunidade ida ne’e, esperiensia foun ne’ebé fo valor  liu ba ha’u nia moris.
• Madre Sebastiana: “ Buat ne’ebé dada ha’u nia atensaun mak fatuk ne’ebé ohin iha orasaun,imi  lori ba tau iha altar  ho vertude oioin, atu hari’i uma ida presiza fatuk, uma nia fundasaun atu metin presiza mos fatuk ne’ebé forte no metin hanesan fatuk ne’ebé ohin imi lori, fatuk ne’ebé atu hari’i uma ne’e sai metin la’os fatuk nara-naran deit,  imi hili fatuk domin nian atu hari’i uma ne’e sai metin, fatuk amizade nian buat ne’ebé ha’u gosta liu iha kolejiu ne’e, fatuk perdaun nian, atu nune’e uma ne’e metin, ita nia komunidade kalan ne’e kompletu iha reprezentante Mama,Papa, ne’ebé hola parte iha komunidade edukativa, iha profesora sira, iha madre sira no imi foinsa’e sira. Entaun ha’u nia hanoin fatuk ida ne’ebé ohin imi hili, tenke sai ha’u nia fatuk, madre ida-idak nia fatuk, professora sira nia fatuk, Papa ho Mama sira nia fatuk no imi foinsa’e sira iha kolejiu ne’e, ida-idak nia fatuk, se ita nia fatuk  sira ne’e tau hamutuk  sai forsa no ita nia uma hamrik metin, anin hu’u sei la monu.

(Maria Sarmento Guterres)