Maun no biin-alin sira, bondia!

Liturjia ohin nian aprezenta mai ita liña ikus sira diskursu misionáriu kapítulu 10 Evanjellu Mateus nian (kf 10,37-42), iha-ne’ebé Jezús hanorin apóstolu sanulu-resin-rua iha momentu nia haruka sira ba dala uluk iha misaun iha aldeia sira Galilea no Judeia nian. Iha parte finál ida-ne’e, Jezús subliña aspetu esensiál rua ba dixípulu misionáriu nia moris: dahuluk, katak ninia ligasaun ho Jezús forte liu ligasaun seluk; daruak, katak misionáriu la lori nia an rasik, maibé Jezús, no liuhusi Nia Aman lalehan nia domin. Aspetu rua ne’e liga malu, tanba hetok Jezús sai dixípulu nia fuan no nia moris nia sentru, hetok dixípulu ne’e sai “transparente” iha ninia prezensa. Buat rua ne’e la’o hamutuk.

«Ema ne’ebé hadomi aman eh inan liufali ha’u, la so’i mai ha’u …» (v. 37), Jezús dehan. Aman ida nia afetu, inan ida nia ternura, amizade midar entre maun-alin no biin-alin, buat sira-ne’e hotu, maski di’ak liu no lejítimu, labele prefere liufali Kristu. La’ós tanba Nia hakarak ita la iha fuan no la hatene agradese, maibé, iha kontráriu, tanba kondisaun dixípulu nian ezije relasionamentu prioritáriu ida ho mestre. Dixípulu naran de’it, leigu ida, leiga ida, amlulik ida, bispu ida: relasionamentu prioritáriu. Karik pergunta dahuluk ita tenke halo ba sarani ida: “Maibé ó hasoru malu ho Jezús? Ó harohan ba Jezús?”. Relasionamentu. Ita bele kuaze halo paralelu ho fraze Livru “Gênesis” nia: Tanba ne’e mak mane sei husik ninia aman no nia inan no sei sai ida de’it ho Jezús Kristu no sira rua sei sai isin ida de’it (Kf Gen 2,24).

Ema ne’ebé husi talin domin nian no moris nian ho Na’i Jezús dada nia, sai ninia reprezentante ida, ninia “embaixadór” ida, liuliu ho “modo de ser”, modu mori snian. To’o iha pontu iha-ne’ebé Jezús rasik, hodi haruka dixípulu sira iha misaun, dehan ba sira: «Ema ne’ebé simu imi simu ha’u, no ema ne’ebé simu ha’u simu ida-ne’ebé haruka ha’u» (Mt 10,40). Presiza tu ema bele haree katak ba dixípulu ne’e, Jezús loos dunu “Na’i”, loos duni sentru ninia moris nian, ninia moris tomak. La importa se ikusmai, nu’udar ema, iha ninia limite sira no mós ninia erru sira mós – sarak nia iha haraik-an atu rekoñese sira –; importante mak nia la iha fuan karuak – no ida-ne’e perigozu. Ha’u sarani, ha’u Jezús nia dixípulu, ha’u amlulik, ha’u bispu, maibé ha’u iha fuan karuak. Lae, ida-ne’e lsala. Labele iha iha fuan karuak, maibé fuan simples, tomak; ne’ebé la iha ai iha sapatu rua, mai onestu ho an rasik no ho ema seluk. Duplisidade la’ós sarani. Tanba ne’e Jezús harohan ba Aman atu dixípulu sira la monu iha espíritu mundu nian. Tenke hili hamutuk ho Jezús, ho Jezús nia espíritu, ka ho espíritu mundu nian.

No iha-ne’e ita-nia esperiénsia amlulik nian hanorin mai ita buat ida furak liu, buat ida importante liu: no ida-ne’e mak akollimentu povu santu Maromak nian, no ida-ne’e mak «bee fresku kopu ida» (v. 42) ne’ebé Na’i ko’alia ohin iha Evanjellu, fó ho fiar domin nian, ne’ebé tulun ó atu sai amlulik di’ak ida! Iha resiprosidade ida iha misaun: se ó husik buat hotu ba Jezús, ema rekoñese Na’i iha ó; maibé tempu hanesan tulun ó au konverte an loron ba loron ba Nia, atu hafoun ó-nia an no purifika ó-nia an husi  hahalok rua-rua no supera tentasaun sira. Hetok amlulik ida besik ba Maromak nia povu, nia sei sente besik liután ba Jezús, no hetok amlulik ida besik ba Jezús, nia sei sente besik liután ba Maromak nia povu.

Virjen Maria esperimenta iha nia an rasik saida mak signifika hadomi Jezús hodi hadook husi an rasik hodi fó sensu foun ba ligasaun familiár, hahú husi fiar iha Nia. Ho ninia intersesaun materna, nia tulun ita atu sia misionáriu/a livre no haksolok Evanjellu nian.