Liturjia domingu ne’e nian hanorin ita iha ne’ebé ita hetan Maromak. Nia garante ita katak Maromak la hatudu An iha arrogánsia, iha foti-an, iha propoténsia, maibé iha simplisidade, iha haraik an, iha pobreza.

Leitura dahuluk aprezenta mai ita Maromak nia manu-ain ne’ebé mai hasoru ema sira iha pobreza, umildade, simplisidade; no ho forma ne’e mak nia elimina instrumentu sira funu no mate nian no instaura dame definitiva.

Iha Evanjellu, Jezús hahí Aman tanba proposta salvasaun ne’ebé Maromak halo ba ema sira (no ema matenek sira hewai) hetan simun/akollimentu iha “ema ki’ik sira” nia fuan. “Ema boot sira”, metin iha sira nia foti-an no autosufisiénsia, la iha tempu no disponibilidade ba Maromak nia dezafiu sira; maibé “ki’ik sira”, iha sira-nia pobreza no simplisidade, disponivel nafatin atu simu Maromak nia novidade libertadora.

Iha leitura daruak, Paulo konvida sarani sira – ne’ebé kompromete an ho Jezús husi kedas loron Batizmu – atu moris “tuir Espíritu” no la’ós “tuir isin”. Moris “tuir isin” mak pertense ba ema sira ne’ebé metin iha sira-nia egoízmu, foti-an no autosufisiénsia; moris “tuir Espíritu” mak moris ida ema sira ne’ebé aseita Maromak nia proposta sira nian.

Download