Dili – Nu’udar tradisaun tinan-tinan joven no labarik oratorianu sira mós aprende hodi agradese aman-inan, benfeitór/a, animadór/a no liuliu aprende hodi agradese malu. Tanba ne’e ohin loron 2 fulan Jullu 2017, sentru Oratoriu Maria Auxiliadora Tasi Tolu halo festa agradesimentu nian.  Atu halo loron ida ne’e sai  signifikativu liután animadór no Irmán sira kolabora ho xefe Bairu, ne’ebé mak ami nia kolaboradór/a direita no aman inan oratorianu sira nian hodi konvida Padre Manuel Pinto SDB hodi halo Misa agradesimentu nian. Iha Missa ne’e partisipa husi oratorianu sira rasik no mós sira-nia aman-inan.

Durante Misa Pe. Manuel iha nia omilia dehan: “Fuan ne’ebé hatene agradese mak fuan ne’ebé simu domin degrasa husi aman-inan ka husi ema seluk”.  Iha oratóriu buat barak mak simu degrasa, presiza matan moris no neon na’in atu aprende.

Inan-aman mós sente kontente tanba sira mós kontribui hahan, família ida-ida lori buat ruma tau hamutuk hodi han ho oan sira. Hafoin han hotu tiha, oratorianu sira agradese hodi dansa husi grupu oinoin, hanesan grupu Don Bosco, Madre Mazzarello, Laura V., Domingos Savio no Anju sira.

Festa la’o ho di’ak agradese ba aman-inan liuliu komunidade edukativa, maski foin mak hahú forma grupu ida ne’e maibé sira fó an hodi kolabora ho animadór sira. Sira kontribui buat barak sira-nia tempu no mós konsumu nian. Tebes duni, servisu iha equipa mak vantajen boot atu hala’o misaun di’ak liu. Agradese ba aman-inan, animadór/a sira-nia prezensa iha Oratóriu.

(Lucia Pereira)