Dili – Irmán perpétua  primeira idade sira hamutuk  na’in 20, tuir enkontru formasaun permanente ne’ebé, Amu-Bispu Dioseze Dili, Don Virgiíio do Carmo da Silva sdb mak fó, iha salaun enkontru João Paulo II,  Comoro, loron 1 Jullu 2017. Tema formasaun nain mak “Importánsia kolókiu nian iha vida relijioza saleziana”.

Saida mak kolókiu

Tema ne’ebé Amu-Bispu hato’o ba Irmán sira mak “ KOLÓKIU”  ho liafuan seluk  ne’ebé uza iha kontestu Salezianu mak  liafuan Friendly talk  ou Manifestasaun.  Iha kolókiu nia laran ita bele hare ema na’in rua ne’ebé halo diálogu entre  Irmán ida ho ninia superiora.  Haree fila fali ba ita nia orijen katak iha tempu  Don Bosco no Madre Mazzarello  nian fó importánsia liu ba Kolókiu ho superiora, tanba kolókiu mak  nu’udar xave ida/master key iha ne’ebé Don Bosco mós refere liu ba estrutura ita-nia kongregasaun nian.  Referénsia sira  tulun  atu komprende importánsia kolókiu nian  ne’ebé foti mós liafuan husi padre Ricaldone ne’ebé dehan: “se ema ida la komprende kona-ba importánsia kolókiu nian, nia mós lakomprende kona-ba vida relijioza liu-liu vida Saleziana”. Don Rua mós repete bebeik: “bainhira ko’alia kona-ba kolókiu laiha buat ida ne’ebé impede ita ka atividade sira mós la impede ita atu ba kolókiu”.

Figura superiora no atitude sira nia tenke iha 

Sai Inan/motherly: iha kolókiu “madre superiora” sira tenke sai hanesan inan ne’ebé hatene hakohak Irmán ida-idak ho ninia realidade tomak, simu nia Irmán sira ho fuan inan nian hodi rona ho fuan tomak buat ne’ebé Irmán sira hakarak fahe ho nia. Iha kolókiu ita bele haree oinsá superiora ida bele kria ambiente ne’ebé  fasilita Irmán sira atu sai livre hodi manifesta sira nia an, nune’e sira fahe ho superiora liuliu kona-ba sira nia knaar,  moris orasaun  no moris apostoladu nian. Superiora  tenke hatudu “motherliness”, sai nu’udar inan ida, hanesan Madre Mazzarello, hodi  inkarna atitude ne’e iha moris, hatene hakohak ema hotu.

Don Ricaldone repete tan katak: “superiora sira imita tuir Madre Mazzarello nia moris  iha hanoin  hahalok no ko’alia hanesan Madre Mazzarello nian”.

Sai Irmán entre Irmán sira/sisterly: sai Irmán iha Irmán sira nia le’et.  Iha dejezu ida atu sente sira nia papél  nu’udar superiora hanesan Irmán ida ne’ebé la abandona ninia Irmán sira seluk maibé nia mós partilla ho sira nia ksolok, terus, entuziasmu no dezafiu loroloron nian.

Responsabilidade no Autoridade: sai inan ou biin ida lori kna’ar ida ne’ebé iha responsabilidade no iha autoridade. Sai nu’udar inan ka Irmán iha Irmán sira nia leet,  keta haluha katak superiora nia papél importante mak sentru iha komunidade laran, hanesan Kristu ne’ebé halibur Ninia dixípulu sira tanba misaun ida. Iha ne’e mak tama responsabilidade no autoridade.  Iha kolókiu superiora sira tenke komprende ninia Irmán sira nune’e mós Irmán tenke komprende superiora atu nune’e bele tulun eh ajuda malu.

Konteúdu iha kolókiu

Haree liu ba fizionomia, iha knaar sira ne’ebé ita hala’o iha moris loroloron nian.

Forum esternu: ita nia kolókiu ho superiora sira, hotu-hotu esternu de’it kona-ba saude, estudu ou iha vida atividade apostólika, difikuldade ne’ebé hasoru iha vida relijioza ninian, vida fraterna ne’ebé kontribui ba ema nia moris.

Forum internu: buat ne’ebé liga ho konxiénsia  ita la pronta  atu fahe,  superiora la ezije. Buat ne’ebé presiza atu ko’alia mak buat ne’ebé iha ligasaun ho ita nia serbisu no apostoladu. Buat ne’ebé liga ho konxiénsia ne’e livre atu fahe no superiora labele obriga atu fahe buat ne’ebé Irmán  la sente atu fahe.

Buat ne’ebé sai  nu’udar rekizitu ba garante prátika di’ak kolókiu nian ho superiora mak sai disponivel hodi fó tempu barak atu rona Irmán sira; rona ho pasiénsia, apresia no mós iha interese ba sira no, nia finalidade atu manán Irmán nia konfiansa.

Buat ne’ebé tenke fó atensaun liu iha kolókiu mak “ ema nia segredu” . Tan ne’e presiza  kria eh tau iha atensaun liafuan “nothing, never, no one”  la ko’alia sai, nunka ko’alia sai, ba sé de’it.

Akompañamentu, gia espirituál no dixernimentu

Ita-nia gia espirituál loloos mak Espíritu Santu, ita mak mediadór/a  Espíritu Santu nian.

Tuir tradisaun Saleziana superiora bele sai mós gia espirituál nune’e bele garante akompañamentu espirituál ida ho kontinuidade ba formasaun no mós atu salva-guarda ba liberdade individuál.

Frenkuénsia  ba ita-nia kolókiu kada fulan ou presiza, ka iha okaziaun sira ne’ebé importante atu halo diálogu  ho di’ak no hatene rona ho pasiénsia Irmán ida-idak.

Tópiku ikus nian mak “Dixernimentu”. Ita ida-idak submete an ba dixernimentu espiirituál ho ita nia gia espirituál tulun ita atu komprende Maromak nia planu mai ita.

Atu halo dixernimentu di’ak presiza haree ba pontu sira mak hanesan: Maromak hadomi  ha’u, sai konxiente katak Maromak iha planu mai ha’u; rona Maromak nia liafuan;  loke fuan ba gia espirituál.

Serteza ne’ebé  bele fó garantia mai ita  kona-ba Maromak nia domin, pasiénsia  mak  liu husi ita-nia fidelidade ba Kreda nia hanorin, vida fraterna,  serenidade iha moris loro-loron.

(Ines Bartolo)