Husi komunidade Maria Auxiliadora, Venilale

Venilale – “Jezús nia bolun hanesan vokasaun ne´ebé ema ida simu husi  Maromak. Vokasaun  hanesan relasaun ida ne´ebé ema halo ho ema seluk  no relasaun ida ne´e uluk nanain ema presiza halo ho nia an rasik, hafoin ho  Maromak, ho ema seluk no ho rikusoin mundu nian.  vokasaun presiza lao hamutuk ho ema nia fiar, tamba ho fiar mak ajuda ema atu bele deskobre Maromak nia hakarak iha nia dalan, fiar ne´e liu husi tau laran metin iha Na´i, rona nia liafuan sira hodi reflete no buka atu moris tuir iha moris loron loron nian tuir Maromank nia planu ”.

 

Ne´e mak reflesaun ne´ebé formande sira hamutuk nain 16 ( Pre – Aspirante no voluntária vokasionál) halo iha sira nia retiru iha loron ne´e hamutuk ho Pe. Tomás SDB nu´udar pregadór ba sira iha tinan ida-ne´e.  Retiru ne´e mós mak momento ikus nian ba sira atu halo desizaun ba sira ida-idak ne´ebé hakarak kontinua no mós ba sira ne´ebé iha hakaran atu tuir dalan seluk tuir planu Maromak nian ba sira. Sira-nia retiru ne´e hala’o dhusi loron 12 to´o 13 Juñu. Iha loron 12 loraik sira hahú enkontru ho irmán Paola Battagliola  FMA nu´udar Provinsiál  ba Inspetoria TIN hodi ko’alia kona ba Jezús nia hakaran ba ema ida-idak no ema ida-idak presiza koñese  sé mak nia. Iha parte ne´e Madre fo korajen ba sira kona ba oinsá moris iha vida ne´e, ne´ebé  nafatin hasoru dezafiu oioin, maibé ho dezafiu hirak ne´e mak sei tulun ita atu deskobre liu tan ita-nia vokasaun no Maromak nia hakaran mai ita . Hafoin iha parte ruma orasaun nian sira fahe hamutuk Maromak futar Liafuan husi pasajen Mt. 9, 9–13 ne´ebé ko’alia kona-ba Mateus nia vokasaun; sira hotu fahe ho ksolok tuir sira ida-idak nia reflesaun no sira-nia esperiénsia. Iha loron tuir mai sira kontinua ho sira nia retiru no konfisaun hafoin han meiu hamutuk no komprimenta irmán Paola no fahe malu hodi fila ba ba uma.