Solenidade ida-ne’e mak festa movel ida no selebra iha loron sesta depoizde Corpus Domini; sábadu tuirmai loron dedika ba Maria nia Fuan Sala-Laek. Místika franseza ida santa Margarida Maria Alacoque mak mensajeira ba kultu ida-ne’e no iha 1856 Papa Pio IX habelar ba Kreda Katólika tomak.

Sá loos signifikadu festa ne’e nian? Ho kultu “Sagrado Coração de Jesus”, Kreda Katólika intende fó onra ba Jezús Kristu nia futar Fuan, órgaun ida ne’ebé simboliza ninia umanidade, ne’ebé iha unidade íntima ho Divindade, iha direitu ba adorasaun no domin Maso’ik nian ba ema sira, ne’ebé nia Fuan mak símbolu ba domin ne’e.

Bainhira mak devosaun ne’e mosu?

Devosaun ne’e pratika ona iha tempu antigu kristaun no iha Medioevu, kultu habelar iha sékulu XVII tanba S. João Eudes ninia obra (1601-1680) no liuliu S. Margarida Maria Alacoque (1647-1690). Provavelmente festa “Sagrado Coração” selebra ba dala uluk iha Fransa iha 1685.

Sé mak mensajeira Jezús nia Fuan nian?

S. Margherita Maria Alacoque, Irmán franseza ida, tama iha konventu Vizitasaun sira nian iha Paray-le-Monial (Saone-et-Loire) iha loron 20 Juñu 1671, no moris iha simplisidade no místika ninia esperiénsia relijioza no mate iha 17  Outubru 1690 ho tinan 43 de’it. Molok tama konventu, nia iha ona don místiku ne’ebé sai maka’as ho ninia kondisaun foun relijioza nian; nia iha manifestasaun místika barak, maibé iha 1673 hahú iha vizaun boboot ne’ebé halo nia naran sai famozu; iha revelasaun prinsipál haat, aleinde barak seluk ne’ebé iha importánsia ki’ik.

Hira no sá de’it S. Margarida nia vizaun místika sira?

Vizaun dahuluk akontese iha 27 Dezembru 1673, festa S. João Evanjelista nian, Jezús mosu ba nia no Margarida sente, “prezensa divina hakonu tomak nia”; konvida nia atu foti fatin ne’ebé S. João okupa durante “Han-Kalan Ikus no dehan ba nia: “Ha’u-nia Fuan divinu apaixonadu tebes ho domin ba ema sira, nune’e tanba labele taka metin iha an rasik ninia karidade maka’as nia lakan sira, presiza atu habelar. Ha’u hili ó atu kumpre projetu boot ida-ne’e, atu nune’e buat hotu ha’u mak halo”.

Vizaun daruak mosu iha inísiu 1674, karik sesta ida; Fuan divinu manifesta an iha tronu ida ahi-lakan nian, nabilan liu loromatan no transparente hanesan kristál, hale’u ho koroa ida ai-tarak nian simboliza kanek sira ne’ebé ita-nia salan halo no iha nia leten harii krús ida, tanba husi momentu ne’ebé nia forma, nia nakonu ho terus oioin. Nafatin iha 1674 mosu vizaun datoluk, ida-ne’e mós iha sesta ida depoizde festa Corpus Domini; Jezús aprezenta an ba Santa ho glória nabilan, ho ninia kanek lima, nabilan hanesan loron no husi umanidade sagrada ne’e sai ahi-lakan husi parte hotu, maibé liuliu husi nia fuan nabilan hanesan fornu ida no bainhira loke, nia haree Fuan maus no domin-na’in, hun loloos ba ahi-lakan sira ne’e.

Hafoin Jezús hodi lamenta ba ema nia ingratidaun no indiferensa ba ninia esforsu sira atu halo di’ak ba sira, husu nia atu taka  falta ida-ne’e. Jezús husu nia atu halo Komuñaun iha loron sesta dahuluk fulan ida-idak nian no atu hakdasak rabat rai ho oin taka ba rai iha tuku sanulu-resin-ida kalan to’o meianoite, iha kalan sira entre kinta no sesta. Nune’e mai indikasaun ba devosaun prinsipál rua, Komuñaun iha primeira sesta fulan-fulan no oras santa adorasaun nian.

Iha revelasaun ida-ne’ebé mak institui festa “Sagrado Coração”?

Vizaun místika dahaat akontese iha 16 Juñu 1675 durante oitava Corpus Domini nian. Ita-nia Na’i dehan ba nia katak nia sente kanek husi sarani sira nia respeitu-laek no husi ema aat sira-nia sakriléjiu, hodi hatutan: “Buat ne’ebé halo ha’u sente liu mak fuan sira ne’ebé konsagra mai ha’u mak halo ida-ne’e”.

Jezús husu tan katak iha sesta depoizde oitava Corpus Domini, dedika festa partikulár ida atu fó onra ba ninia Fuan ho Komuñaun atu halo reparasaun ba ofensa sira nia simu. Aleinde ne’e nia indika nu’udar mahalok eh ezekutór ba devosaun ne’e ninia difuzaun, Margarida nia padre espirituál, jezuita S. Claude de la Colombiere (1641-1682), superiór Jezuita nia Uma iha Paray-le-Monial ne’ebé besik ba konventu. Margarida Maria Alacoque ne’ebé Papa Bento XV proklama santa iha 13 Maiu 1920, obedese ba apelu divinu halo ba nia liuhusi vizaun sira no sai apóstola devosaun ida ne’ebé tenke lori sarani sira ba adorasaun ba Na’i Maromak nia futar Fuan.

Serimónia rua dahuluk atu fó onra ba  “Sagrado Coração”, iha ne’ebé santa místika ne’e prezente, halo iha ámbitu Novisiadu Paray nian iha 20 Jullu 1685 no hafoin iha 21 Juñu 1686, iha-ne’ebé Komunidade Vizitasaun tomak partisipa.

Kultu ba “Sagrado Coração” hetan obstákulu? No husi sé?

Sín, liuliu iha sékulu XVIII. Iha 1765 “Sagrada Congregação dos Ritos” afirma fuan isin nian nu’udar símbolu domin nian; entaun jansenista sira haree ida-ne’e nu’udar hahalok ida idolatria nian, hodi dehan katak posivel iha kultu ida ba fuan la’ós reál maibé metafóriku. Papa Pio VI (1775-1799) iha bula “Auctorem fidei”, konfirma “Congregação” nia espresaun hodi hakerek katak adora fuan “ida de’it haketak-laek husi Verbu nia Pessoa”.

Iha 6 Fevereiru Papa Clemente XIII (1758-1769) fó ba Polónia no Arkikonfraria romana “Sagrado Coração” nian, festa “Sagrado Coração de Jesus”; iha Amu-Papa ne’e nia hanoin festa foun ne’e tenke habelar iha Kreda, pasu prinsipál sira S. Margarida nia mensajen nian, ne’ebé sai intrumentu privilejiadu ba difuzuan kultu nian, ne’ebé sempre eziste iha Kreda ho forma oioin, maibé hodi fó orientasaun foun ida. Ho nia la iha de’it kontemplasaun domin nian no adorasaun ida ba “Fuan ne’ebé hadomi tebes”, maibé mós reparasaun ba ofensa no ingratidaun sira ne’ebé nia simu, liuhusi ita-nia moris nia aperfeisoamentu.

Santa Margarida hateten katak “domin halo klamar sira moris tuir”, katak Na’i hakarak inspira iha klamar sira domin jenerozu ida ne’ebé, hodi hatán ba ninia domin, asimila sira interiormente ba modelu divinu.

Amu-Papa ida-ne’ebé harii ofisialmente festa “Sagrado Coração” nian?

Devosaun ba “Sagrado Coração” sai boot iha sékulu XIX no iha konventu Paray-le-Monial sai meta ba peregrinasaun kontínua; iha 1856 ho Papa Pio IX festa “Sagrado Coração” sai universál ba Kreda Katólika tomak.

Ho devosaun ne’ebé envolve mundu katóliku tomak, mosu iha fatin hotu kapela sira, oratóriu sira, kreda sira, bazílika sira no santuáriu sira dedika ba “Sagrado Coração de Jesus”; ita hanoin kona-ba Santuáriu “Sagrado Coração” iha Montmartre iha Paris, hahú iha 1876 no remata atu harii depoizde tinan 40; kategoria hotu sosiál no militár Fransa nian, kontribui ba despeza maka’as ne’e.

Sá de’it prátika devosionál komún liu?

Adorasaun eukarístika iha loron sesta dahuluk fulan nian no ladaiña ba “Sagrado Coração” nian. Fulan dedika ba kultu “Sagrado Coração” nian mak Juñu.

Katak sá “Ato Consagração ao Sagrado Coração”? (Konsagrasaun ba Jezús nia futar Fuan Santu)

Atu kultu ba “Sagrado Coração” sai no tama kle’an iha vida sosiál povu sira-nian, Papa Pio IX nia ezortasaun iha 1876, halo mosu movimentu ida konsagrasaun ba “Sagrado Coração”. Hahú husi família sira to’o Nasaun tomak hodi Konferénsia Espiskopál sira nia obra, maibé mós ho governante sira ne’ebé iha devosaun, hanesan prezidente Equador nian, Gabriel Garcia Moreno (1821-1875).

Maka’as tebes fervór ne’ebé mosu, nune’e tinan 800 no dékada dahuluk 900 nian, dedika ba “Sagrado Coração”, no husi ne’e mosu kongregasaun relijioza barak, mane no feto, no entre sira-ne’e mak: Kongregasaun SCJ, (amlulik “Sagrado Coração” nian) harii iha 1874 husi beatu Leone Dehon (Dehonianos); “Filhos do Sagrado Coração” ka “Missioni africane di Verona”, kongregasaun funda iha 1867 husi S. Daniele Comboni (Combonianos); “Damas do Sagrado Coração” funda iha 1800 husi santa Maddalena Sofia Barat; “Servas do Sagrado Coração”funda iha 1865 husi beata Caterina Volpicelli, Institutu femininu oioin ne’ebé lori naran hanesan.

Oinsá moris kultu ba “Coração Imaculado de Maria”?

S. João Eudes (1601-1680) mak promotór ne’ebé iha 1643, hahú selebra festa “Maria nia futar Fuan Sala-Laek” ho relijiozu sira ninia kongregasaun nian. Iha 1668 kardeál legadu ba Fransa tomak aprova festa no testu litúrjiku sira, enkuantu Roma dalabarak lakohi konfirma festa ne’e. Depoizde introdusaun festa “Sagrado Croração de Jesus” iha 1765, mak fó kbiit atu selebra ida “Maria nia Fuan” nian, nune’e mak Missal Romano 1814 nian konsidera festa ne’e entre festa sira “pro aliquibus locis” (ba área ruma). Papa Pio XII habelar festa ne’e iha 1944 ba Kreda tomak, hodi hanoin ba nafatin Konsagrasaun mundu nian ba “Coração Imaculado de Maria”, ne’ebé nia halo iha 1942. Kultu ba Maria nia Fuar Fuan Sala-Laek simu impulsu maka’as depoizde aparisaun sira Fátima nian iha 1917, bainhira Na’i-Feto halo pedidu atu konsagra Rússia ba ninia Fuan Sala-Laek, pedidu lalehan nian ne’ebé seidauk hetan resposta.