Sidade Vaticano – Amu-Papa simu iha loron 13 Juñu iha audiénsia membru sira Konsellu Ordináriu Jerál da-13 Sínodu Bispu sira nian no fó hatene ba sira katak nia sei remata Ensíklika kona-ba fiar ne’ebé Bento XVI hahú tiha ona hakerek.

Ba dala uluk mak Amu-Papa konfirma publikamente katak nia sei remata ensíklika kona-ba fiar.

Loron ruma liubá Bispu Molfetta-Ruvo-Giovinazzo-Terlizzi (Itália) nian, D. Luigi Martella, fó sai tiha ona katak Papa Francisco prepara hela ensíklika kona-ba fiar no ida tan kona-ba pobreza ne’ebé bele fó títulu “Beati pauperes”.

 

Iha nia diskursu ohin, Papa reflete ho Sekretaria Sínodu nian kona-ba Evanjelizasaun foun ba fiar nia tranzmisaun. “Entre elementu rua ne’e – Amu-Papa hateten – iha ligasaun metin: tranzmisaun fiar sarani no objetivu evanjelizasaun foun nian no obra evangelizadora Kreda nian, ne’ebé eziste loos duni ba buat ne’e”.

“Fraze ‘evanjelizasaun foun’ hatudu serteza katak iha país ho tradisaun sarani tuan presiza atu iha anúnsiu foun Evanjellu nian atu lori ba enkontru ida ho Kristu ne’ebé loos duni nakfilak moris no la’ós superfisiál no rotineiru. No ida-ne’e iha kigasaun ho asaun pastorál”.

Santu Padre temi kedas liafuan Paulo VI nian iha ninia diskursu ba koléjiu kardenalísiu iha 1973: “kondisaun sosiedade nian obriga ita atu halo revizaun ba métodu sira, atu koko ho meiu hotu estuda oinsá lori ba ema sira ita-nia tempu nian mensajen sarani, basá ho nia de’it mak bele hetan resposta ba ninia lia-husun sira no forsa ba ninia kompromisu solidariedade umana nian”.

“Ha’u hakarak fó korajen ba komunidade ekleziál tomak –Papa Francisco hatutan – atu keta ta’uk ‘sai’ husi nia an, hodi laran metin liuliu ba Maromak nia prezensa laran-sadia nian ne’ebé gia ita. Efetivamente, téknika sira importante maibé ida ne’ebé perfeita liu mós la bele troka asaun diskreta maibé efikás atór prinsipál evanjelizasaun nian: Espíritu Santu”.

Francisco resalta katak “presiza husik atu Nia lori ita, maski lori tuir lurón foun sira; presiza husi Nia transforma ita atu ita-nia anúnsiu sai nafatin liafuan ne’ebé akompaña ho simplisidade moris nian, espíritu orasuan nian, karidade ba ema hotu, liuliu ki’ik no kiak sira; haraik-an no hamamuk-an, santida moris nian”.

Sínodu Bispu sira nian “mak fuan ida Konsíliu Vaticano II nian” no “agradese ba Maormak, iha tinan limanulu ne’e bele sente benefísiu sira institutisaun ne’e nian ne’ebé, ho forma permanente, moris iha servisu ba misaun no komuñaun Kreda nian, nu’udar espresaun kolejialidade nian”.

“Nakloke ba grasa Espíritu Santu nian, kbiit Kreda nian, ita konfia katak Sínodu sei di’ak liután atu favorese diálogu no kolaborasaun entre bispu sira entre sira no Bispu Roma nian”, Santu Padre konklui.