RV/Redasaun – Papa Francisco iha audiénsia kuarta 21 Juñu, ko’alia kona-ba “Santu sira: sasin no maluk esperansa nian”.

Amu-Papa Francisco fó hanoin kona-ba momentu sira vida kristán nian  ne’ebé ita invoka intersesaun santu sira-nian: durante Batizmu, Matimóniu no Ordenasaun saserdotál. Kristianizmu kuda konfiansa iha ema: nia la fiar katak forsa negativa no divizaun nian bele manán. “Liafuan ikus iha ema nia istória la’ós ódiu, la’ós mate, la’ós funu”, Amu-Papa hateten.

Iha momentu ida-idak moris sarani nian, ema hetan asisténsia husi Maromak nia liman no husi prezensa diskreta sarani sira nian ne’ebé bá uluk ona molok ita. Ezisténsia santu sira-nian, Tuir Papa Francisco dehan katak vida sarani la’ós ideál ida labele alkansa; nia lori konfortu katak ema la mesak, katak Igreja forma husi maun-alin lubuk ida, dalabarak anónimu, ne’ebé iha molok ita, no hodi Espíritu Santu nia asaun, sira envolve an iha akontesimentu sira ne’ebé sei la’o iha rai ne’e. Kabe-na’in sira hatene katak sira presiza Maromak nia grasa no santu sira nia tulun atu dehan “ba nafatin”. “La’ós hanesan ema balun hateten, ‘to’o bainhira domin sei dura’. Ba nafatin eh lae. Iha kontráriu, di’ak liu la kaben”, Papa Francisco hateten.

Iha momentu difisil, Santu Padre hatutan, presiza iha korajen atu foti matan ba lalehan, hodi hanoin sarani barak ne’ebé hasoru susar sira. “Maromak la abandona, nunka: bainhira ita presiza, anju ida sei mai atu konsola ita. “Anju sira” dalaruma iha oin no fuan ema nian, tanba Maromak nia santu sira iha nafatin iha-ne’e, haksumik an iha ita-nia leet”.

“Atu Na’i haraik mai ita esperansa atu sai santu. Ne’e mak prezente boot ne’ebé ita ida-idak bele fó iha mundu ne’e. Ema ruma bele husu mai ha’u: maibé posivel sai santu iha moris loroloron nian? Sai santu la signifika reza tempu tomak, maibé halo devér rasik. Reza, serbisu, tau matan ba oan sira, maibé halo buat hotu ho fuan nakloke ba Maromak. Nune’e ita sei sai santu. Posivel. La’ós difisil. Fasil liu sai santu duké sai delinkuente (ema aat). Posivel tanba Na’i tulun ita”.