Iha domingu ne’e, Liafuan ne’ebé ita sei reflete fó hanoin mai ita kona-ba Maromak nia prezensa konstante iha mundu no ninia vontade atu oferese salvasaun ba ema sira. Maski nune’e, Maromak nia intervensaun iha istória umana konkretiza liuhusi sira ne’ebé nia bolu no haruka, atu sai sinál vizivel nina domin nian no sasin ninia laran-di’ak.

Leitura dahuluk aprezenta mai ita Maromak “Aliansa” nian, ne’ebé hili Povu ida atu estabele talin komuñaun no familiaridade ho nia; ba Povu ida-ne’e, Jahwéh konfia misaun saserdotál ida: Israel tenke sai Povu ida rezerva ba servisu Jahwéh, katak, sai sinal Maromak nian iha nasaun sira seluk.

Evanjellu lori “diskursu misaun nian”. Mateus aprezenta katekeze kona-ba hilin, bolun no enviu “na’in sanulu-resin-rua” nian (ne’ebé reprezenta totalidade Maromak nia Povu) atu haklaken “Reinu”. “Sanulu-resin-rua” sei sai kontinuadór misaun Jezús no sira tenke lori proposta salvasaun no libertasaun ne’ebé Maromak halo ba ema sira iha Jezús, ba rai tomak.

Leitura daruak sujere komunidade dixípulu sira fundamentalmente komunidade ema sira-nian ne’ebé Maromak hadomi. Ninia misaun iha mundu mak fó sasin Maromak nia domin ba ema sira – domin rohan-laek, la-kotu, gratuitu no absolutamente úniku.

Download