Sidade Vaticano – Papa Francisco ohin konvida katóliku sira atu profesa konviksaun katak Maromak “maka’as liu” buat aat no halo ema rihun ba rihun iha Prasa S. Pedro atu repete fraze ne’e.

“Iha ita-nia sori-sorin, natón de’it loke jornál ida, ita haree katak iha prezensa aat nian, diabu atua, maibé ha’u hakarak dehan ho lian maka’as: Maromak maka’as liu. Ha’u hakarak hatutan katak realidade, dalaru,a nakukun, marka ho aat, bele muda, se ita lori iha fatin uluk liu roman Evanjellu nian”, Papa Francisco deklara, iha katekeze audiénsia públika ohin.

[Asesu kópia ho lia-portugés]

 

Amu-Papa konvida partisipante sira iha enkontru atu dehan ho nia: “Maromak maka’as liu”, hodi repete fraze ne’e liu dala ida.

Francisco aprezenta reflesaun ida kona-ba espresaun ‘Maromak nia Povu, ne’ebé define Kreda Katólika, hodi fó hanoin katak “Jezus ka dehan ba Apóstolu sira atu forma grupu eskluzivu ida, grupu ida elite nian”.

“Ha’u mós hakarak dehan ba ema ne’ebé sente an dook husi Maromak no Kreda, ba ema ne’ebé ta’uk ka indiferente, ba em ane’eb´ehanoin katak nia la bele on amuda: Na’i bolu ó atu halo parte iha ni apovu no halo ne’e ho respeitu no domin boot”, nia hatutan.

Iha sentidu ne’e, Amu-Papa defende katak Kreda tenke iha “odamatan nakloke” atu ema hotu bele tama.

Katekeze ko’alia kona-ba “domin ba Maromak no ba maluk” nu’udar lei Maromak nia Povu nian, domin ida ne’ebé “la’ós estéril, sentimentalizmu ka buat ruma la klaru” no lori atu “simu ema seluk nu’udar maun-alin loloos, hodi supera rivalidade sira, inkomprensaun sira, egoízmu sira”.

Francisco temi kona-ba “funu barabarak” entre sarani sira, iha família sira, iha bairru sira, hodi husu atu hotu-hotu hatene tau iha fatin uluk liu “ukun-fuan domin nian”.

“Karik ita barak hirus uitoan ho ema ruma. Entaun, ita dehan: Na’i, ha’u hirus hela ho ida ne’e no ida ne’ebá, ha’u harohan ba nia. Harohan ba ema ne’ebé ita hirus mak ain-hakat furak iha lei domin nian”, nia sujere.

Katekeze Amu-Papa nian destaka katak Maromak “la’ós povu ida nia soin eskluziva”, maibé Nia mak konvida atu “hola parte ba nia povu”.

Ikusnian Amu-Papa harohan atu Kreda sai fatin laran-sadia no esperansa Maromak nian, iha-ne’ebé  ema ida-idak sente ema simu nian. sente perdaun no simu kbiit atu moris tuir Evanjellu.

Iha finál audiénsia jerál, Papa denunsia “fenómenu aat” hanehan labarik ki’ik sira ho serbisu. Susar ba sira ne’ebé buti metin labarik sira-nia esperansa. Papa Francisco lansa reprensaun maka’as ba sira ne’ebé envezde “husik labarik sira halimar” halo sira sai “atan”. Esplorasaun labarik ki’ik sira-nian iha serbisu doméstiku – ne’ebé aumenta liuliu iha país kiak sira – tuir Papa Francisco – iha  labarik tokon ba tokon sai atan, “liuliu labarik feto sira sai vítima forma haksumik esplorasuan nian ne’e inklui ho frekuénsia abuzu, tratamentu aat no diskriminasaun sira”.  Nia halo votus atu komunidade internasionál foti “medida efikás liután” atu kontrasta kanek aat ida-ne’e.