Venilale – Komunidade edukativa Venilale, kada sábadu dahuluk fulan nian halo formasaun litúrjika. Tema ohin, 3 Juñu nian mak, liturjia eukarístika, katak parte daruak Missa nian.

Liturjia Eukarístika konsiste esensialmente iha han-kalan sakrifísiu nian ne’ebé, liuhusi sinál paun no tua, reprezenta no perpetua iha altár, Na’i Jezús Kristu nia sakrifísiu paskál, ne’ebé Nia rasik haruka atu halo hodi hanoin Nia.

Igreja dispoin selebrasaun eukarístika tomak atu korresponde ho Kristu nia liafuan no jestu sira: iha preparasaun don sira nian lori ba altár paun no tua ho bee, katak elementu sira ne’ebé Kristu foti iha nia liman sira; iha orasaun eukarístika, ita fó grasa ba Maromak ba obra salvasaun tomak no oferenda sira nakfilak ba Kristu nia Isin no Raan; liuhusi silu paun no komuñaun sarani sira-nia, ita maski barak, simu Na’i nia Isin no raan husi paun ida de’it no kalix ida de’it.

Tanba tempu la to’o, basá depoizde formasuan iha kedas Missa, tópiku ohin nian kona de’it ba preparasaun oferta nian.

Amlulik prepara altár hodi tau korporál no missal ne’ebé akólitu sira lori husi ‘credência’. Se karik iha prosisaun, hamutuk ho karan seluk, paun no tua de’it mak amlulik tau iha altár, hodi harohan tuir fórmula sira ne’ebé iha; amlulik bele insensa oferenda sira iha altár leten, hafoin krús no altár rasik. Hafoin amlulik fase liman, nu’udar ritu purifikasaun nian. Hotu tiha ritu sira, preparasaun oferta sira-nian, amluli konvida sarani sira atu harohan ho nia. Sarani sira hamriik ho parte ne’e remata ho orasaun ba oblata sira, ne’ebé sarani hotu hatán ho aklamasaun ‘Amen’.

Observasaun ruma

• Padre la fó bensan ba bee iha ‘galheta’ ne’ebé atu uza ba ofertóriu, basá la tama iha ritu.
• Kona-ba oferta seluk hanesan “osan”: loloos tenke halo peditóriu iha momentu ofertóriu, nune’e mós lori ba altár iha momentu ofertóriu. Tanba ne’e presiza multiplika bornál eh fatin atu halo peditóriu.
• La iha dansa iha ‘Rito Romano’, nune’e la presiza introdús dansa ba ofertóriu. Razaun tanba “Santa Missa mak renovasaun ita-nia Na’i ninia Sakrifísiu Úniku no Eternu (kf. CIC 1362-1372; 1411).
• Resposta loloos povu nian ba selebrante nia konvite “Maun-alin sira, ita harohan atu Maromak simu ita-nia sakrifísiu ne’e…”: “Na’i simu ita-nia sakrifísiu ne’e, atu hahí Nia naran, atu hetan di’ak mai ita no ba Santa Kreda tomak”. La’ós “atu hahí Ita naran“.