RV – Iha Regina Coeli domingu 21 Maiu, Papa Francisco fó hanoin kona-ba Evanjellu loron nian, iha-ne’ebé evanjelista João hato’o Jezús nia sentimentu sira no hanorin ikus molok hasoru terus no mate. Jezús promete ba nia belun sira katak, depoizde Nia, sei mai fali paráklitu/konsoladór ida, defensór, advogadu, “Espíritu Lia-Loos” nian. Nia promete: “Ha’u sei la husik imi oan-kiak, ha’u sei mai ba imi”.

Liafuan sira-ne’e – Amu-Papa  kontinua – lori ksolok tanba Kristu nia fila hikas foun: Nia, moris-hi’as no horik iha glória, hamutuk ho Aman no, tempu hanesan, mai hasoru ita, hodi Espíritu Santu.

Kreda nia misaun

Hodi medita Jezús nia liafuan sira-ne’e, ohin ita komprende sentidu fiar sai Maromak nia Povu iha komuñaun ho Aman no ho Jezús liuhusi Espíritu Santu. Iha mistériu komuñaun nian, Kreda hetan bee-matan ne’ebé la mohu ninia misuan rasik nian, ne’ebé realiza liuhusi domin. Hanesan Jezús dehan iha Evanjellu: “Ema ne’ebé simu ha’u-nia ukun-fuan no halo tuir, sira mak hadomi ha’u. Ema ne’ebé hadomi ha’u, ha’u Aman sei hadomi nia no ha’u mós sei hadomi nia no sei hatudu an iha nia”.

“Domin mak introdús ita iha koñesimentu Jezús nian, hodi Espíritu Santu nia asaun. Domin ba MAromak no ba maluk mak ukun-fuan boot liu Evanjellu nian. Na’i ohin bolu ita atu korresponde ho laran-luak ba bolun evanjéliku ba domin, hodi tau Maromak iha ita-nia moris nia sentru no dedika an ba servisu maun-alin sira-nian, liuliu sira ne’ebé presiza liu apoiu no konsolasaun”, Amu-Papa subliña.

Komunidade sarani

Se eziste komportamentu ida ne’ebé la’ós fasil – Amu-Papa fó hanoin – mak ida hatene hadomi tuir Na’I nia ezemplu no ninia grasa. Dalaruma kontraste sira, inveja sira, divizaun sira husik mós sinál iha Kreda nia oin furak. Komunidade sarani sira tenke moris iha Kristu nia karidade, no oinseluk fali iha nia mak “maligno” tau ninia “ain” no ita dalaruma husik nia bobar ita. No ida-ne’e sofre make ma sira ne’ebé fraku liu espiritualmente.

“Sira hirak mak hadook an tanba la sente ema simu sira, komprende sira no hadomi sira. Ba ema sarani mós buat ida hadomi ne’e la manán dala id aba nafatin; loroloron nia tenke hahú fali; halo ezersísiu atu ita-nia domin ba maun no biin-alin sira ne’ebé ita hasoru sai tasak no purifika husi limite eh salan sira ne’ebé halo ita parsiál, egoista, estéril no infiél. Loroloron ita tenke aprende arte domin nian, loroloron ita tenke tuir ho pasiénsia Kristu nia eskola, ho ninia Espíritu nia tulun”.

Atu Na’i-Feto, perfeita dixípula nia Oan-Mane nian no Na’i, tulun ita sai dosil ba beibeik ba Paráklitu, Espíritu Lia-Loos nian, atu aprende loroloron atu hadomi hanesan Jezús hadomi ita”.

Hotu tiha Regina Coeli, Amu-Papa hanoin ba violénsia sira iha Áfrika no mós husu orasuan ba rai Xina. “Loron 24 MAiu mai ne’e ita sei hamutuk espiritualmente ba sarani katóliku sira iha XIna, iha festa Na’i-Feto “Sarani sira-nia Tulun”, venera iha santuáriu Sheshan, iha Xangai. Ba katóliku sira Xina nian ha’u dehan: ita foti matan ba Maria ita-nia Inan, atu nia tulun ita dixerne Maromak nia vontade kona-ba dalan konkretu Igreja iha Xina no apoia ita atu simu ho laran-luak ninia projetu domin nian. Maria enkoraja ita atu oferese ita-nia kontribuisaun pesoál ba komuñaun entre sarani sira no ba armonia sosiedade tomak nian. Ita keta haluha fó sasin fiar nian ho orasuan no domin, hodi mantein nakloke ba enkontru no diálogu, sempre”.