Sidade Vaticano – “Maromak nia laran-sadia” ne’ebé nia símbolu mak Jezús nia fuan, “haraik moris ba ema, halo nia moris hi’as husi mate”. Ne’e mak tema fundamentál iha ne’ebé Papa Francisco foka molok Angelus iha Prasa S.Pedro, ne’ebé nafatin nakonu ho ema husi mundu tomak.

Papa Francisco, ne’ebé iha atensaun boot ba piedade populár, fó hanoin katak ita foin selebra solenidade Jezús nia Futar Fuan Santu, ne’ebé fó kór ba fulan Juñu tomak. “Piedade populár – nia hatutan – valoriza liu símbolu sira, no Jezús nia Fuan mak símbolu boot liu Maromak nia laran-sadia nian; maibé la’ós símbolu imajináriu ida, nia símbolu reál, ne’ebé reprezenta sentru, bee-matan husi ne’ebé suli salvasaun ba umanidade tomak”.

 

“Maibé Jezús nia laran-sadia la’ós de’it sentimentu ida, liután, forsa ida ne’ebé haraik moris, ne’ebé halo ema moris hi’ás”. Amu-Papa fó hanoin kona-ba Evanjellu misa ohin nian, ne’ebé konta feto-faluk husi Nain nia oan-mane na moris-hi’as (Lucas 7, 11-17).

“Jezús nia matan – Amu-Papa esplika – fihir kedas ba inan ne’ebé tanis. Evanjelista lUcas dehan: «Haree nia, Na’i sai nakonu ho laran-sadia ba nia» (v. 13). «Laran-sadia» ida-ne’e mak Maromak nia domin ba ema, nia mak laran-sadia, katak Maromak nia atitude iha nia kontaktu ho ema nia mizéria, ho ita-nia nesesidade, ita-nia terus, ita-nia laran-susar. Liafuan bíbliku «laran-sadia» fó hanoin kona-ba inan nia knotak; inan, defaktu, koko reasaun ida ninian rasik haree nia oan sira nia terus. Nune’e mak Maromak hadomi ita, Eskritura dehan”.

“No sá loos domin nia fuan” Moris! Jezús dehan ba feto-faluk Nain nian: «Keta tanis!», hafoin nia bolu foin-sa’e mate ona no fanun nia hanesan husi dukur (kf vv. 13-15). Maromak nia laran-sadia haraik moris ba ema, halo nia moris hi’as husi mate, Na’i hateke nafatin mai ita ho laran-sadia, hein ita ho laran-sadia. Ita keta ta’uk atu hakbesik Nia! Nia iha fuan laran-sadia nian! Se ita hatudu ba Nia ita nia kanek sira iha laran, ita-nia salan sira, Nia nafatin perdua ita. Nia mak laran-sadia loos de;it!”. No Papa Francisco repete liu dala ida: “Ita hanoin nafatin: Jezús mak laran-sadia loos de’it! Nia perdua nafatin ita! Ita la’o ba Jezús!”.

No hodi taka, nia hatutan: “Ita hateke ba Virjen Maria: nia futar fuan sala-laek, fuan inan nian, ne’ebé fahe tomak Maromak nia “laran-sadia”, liuliu iha oras Jezús nia terus no mate nian. Atu Maria tulun ita sai ema laran maus, haraik an no laran-sadia ba ita-nia maun-alin sira”.

Angelus hotu tiha Papa Francisco kumprimenta grupu oioin peregrinu sira nian. No repete tan: “Ohin ita keta haluha Jezús nia domin”.