Venilale – Avaliasaun projetu komunitáriu mak momentu importante atu sukat oinsá objetivu sira ne’ebé ita tau to’o duni no implementasaun estratéjia sira ita hili no ativa. Se karik hetan difikuldade eh rezisténsia sira, prosesu saida no kondisaun sá de’it mak ita tenke ativa no habiit atu bele to’o duni ba vizaun no objetivu sira ne’ebé komunidade edukativa hakarak to’o?

Avaliasaun komunidade Madre Mazzarello (Venilale), halo husi loron 20-21 Maiu, iha-ne’ebé partisipante sira mak FMA sira, foin-sa’e animadór sira, profesór/a sira, pesoál klínika. Membru ne’ebé la iha mak reprezentante aman-inan.

Momentu dahuluk (20 Maiu) hahú ho lectio divina hamutuk kona-ba pasajen “Mestre, ita hela iha-ne’ebé?” (Jo 1,38-39) ne’ebé Ir Floriana mak gia. Momentu ne’e sai mós hanesan formasaun hamutuk oinsá halo lectio divina ida. Remata lectio, molok fahe malu, Ir Jacinta Gusmão, ne’ebé fasilita prosesu avaliasaun, fó pergunta sira ba membru sira atu hanoin no fahe iha loron tuirmai.

Momentu daruak (21 Maiu), hahú ho serbisu iha grupu tolu ba hilin tolu projetu komunitáriu nian tuir dalan KJ 23 nian: nakfilak an liuhusi enkontru; hamutuk ho foin-sa’e sira, sai misionária/u esperansa no ksolok nian.

Grupu ida-idak buka atu avalia sá de’it kondisaun sira ne’ebé favorese atu to’o iha objetivu sira; sá de’it difikuldade eh rezisténsia sira hasoru atu bele hala’o planu sira; sá de’it atitude interiór ne’ebé fasilita mudansa eh konversaun; sá de’it prosesu sira ne’ebé presiza habiit, depoizde haree difikuldade sira.

Momentu datoluk, mak membru sira fahe saida mak sira hanoin bele sai jestu profétiku komunidade edukativa hakarak halo, haree ba ita-nia realidade, atu nune’e bele duni atua mudansa eh konversaun pastorál, hodi sai hamutuk ho foin-sa’e sira misionária/u esperansa no ksolok nian.