Sidade Vaticano/cgfma – Sábadu 8 Juñu, memória Na’i-Feto nia Futar Fuan Imakuladu, sai data singulár ba la Madre, M.Yvonne Reungoat, no ba ninia Vigária irmán Emilia Musatti. Dadeersaan de’it, defaktu, sira to’o iha kapela uma Santa Marta nian iha Vaticano, iha-ne’ebé Papa Francisco iha tuku 7 selebra Eukaristia hanesan loroloron halo. Don ida bele marka prezensa, hamutuk ho grupu ida kolaboradór sira Caritas Internationalis nian no sarani sleuk, atu moris hamutuk ho Santu Padre momentu sentrál nia loron nian.

 

“Selebrasaun intensa liu no kle’an” – Madre  Yvonne haktuir– “akompaña ho knananuk no hariku ho Papa Francisco nia liafuan sira iha ninia omilia ne’ebé fó hanoin kona-ba realidade vitál sira. Klima nakonu ho simplisidade, husi kedas momentu tama ba altár, iha-ne’ebé Papa mak Ministru simples ida ne’ebé hakbesik ba Na’i nia meza”.

La Madre fahe iha detalle ho Konselleira sira konteúdu omilia nian, hodi evidensia ninia avizu atu aprende husi Maria oinsá rai Maromak nia Liafuan. Espresaun-xave ne’ebé nia repete  mak “admirasaun no konservasaun”: fó hanoin kona-ba doutór sira iha templu ne’ebé hakfodak hodi rona Jezús nia Liafuan sira, no ba mAria nia kapasidade atu rai/konserva Liafuan iha nia fuan.

Iha konkluzaun ba nia liafuan sira – Madre Yvonne subliña – Amu-Papa konvida atu hanoin oinsá konserva Maromak nia Liafuan, oinsá konserva admirasaun ne’e, atu manu-fuik sira la han nian, vísiu sira la hanehan nia. “Halo di’ak mai ita atu husu ita-nia an rasik – Papa Francisco hateten – ‘Ho buat sira ne’ebé akontese iha mundu, ha’u husu ba an rasik: sá mak Na’i dehna mai ha’u ho ninia Liafuan, iha momentu ida-ne’e?’. Ida-ne’e mak hanaran konserva Maromak nia Liafuan, atu Maromak nia Liafuan mak mensajen ne’ebé Na’i iharaik mai ita iha momentu hotu. Ita konserva nia ho ida-ne’e: konserva nia ho ita-nia memória. No mós konserva nia ho ita-nia esperansa. Ita husu Na’i grasa atu simu Maromak nia Liafuan no konserva nia, no mós grasa atu iha iha fuan ne’ebé haka’as an iha konservasuan ida-ne’e.”

Remata selebrasaun la Madre, hodi hakbesik ba Amu-Papa, sente katak nia rekoñese nia ho afirmasaun: “Ita mak Superiora jerál dahuluk franseza FMA sira-nian!”. Iha konversasaun badak, Madre Yvonne sai portavós ba Irmán hotu mundu nian atu esprime gratidaun no asegura orasaun korál ne’ebé loroloron Institutu hasa’e ba Santu Padre nia intensaun sira. Iha finál nia simu lia-menon: “Keta abandona misaun sira Patagonia nian!”. Apelu presiozu fidelidade nian ba ita-nia abut misionáriu!

Loron ne’e signifikativu liu ba irmán Emilia Musatti mós: ninia loron, loke ho enkontru iha Santa Marta, no taka iha “casa generalizia” ho Selebrasaun eukarístika solene, ne’ebé Reitór-mor nia vigáriu mak prezide, padre Adriano Bregolin, no ho momentu ida festa nian. Irmán sira “casa generalizia” nian no uma sira dependen ba Madre jerál hotu-hotu hale’u nia atu halo festa no hato’o agradesiemntu ba okaziaun tinan 50 Vida relijioza nian.  Ho nia, festa haluan ho irmán seluk uma dependente nian ne’ebé seebra tinan 50 no tinan 25 Profisaun relijioza nian.