Solenidade Jezús nia Futar Fuan Santu nian, ne’ebé Don Bosco hadomi liu no halo parte tradisaun saleziana, hetan roman singulár ida iha Tinan Fiar nian no iha dalan ba bisentenáriu Don Bosco nia moris nian, aman no mestre juventude nian.

Don Bosco iha devosaun boot ba Jezús nia futar Fuan Santu: “Iha ne’e ita hetan manas loloos, ha’u hakarak dehan, Maromak nia domin, no la’ós de’it ba an rasik maibé mós atu lori ba fatin seluk no fahe ho klamar seluk”. Devosaun ne’e haktuir liuhusi konfisaun beibeik no komuñaun no partisipasaun iha misa loroloron, koluna sira ne’ebé tahan edifísiu edukativu no anima prátika Sistema Preventivu nian.

 

Molok nia remata nia moris iha rai, nia aseita Amu-Papa Leaun XIII nia pedidu atu kompleta Bazílika Sacro Cuore iha Roma. Kreda ne’e, ne’ebé Papa Pio IX hahú iha tinan 1870, konsege hotu iha tinan ruma de’it (1880-1887), tanba Don Bosco nia haka’as-an. Emprendimentu ida ne’ebé husu sakrifísiu maka’as husi nia.

Ninia susesór dahuluk, beatu Michele Rua, konsagra Kongregasaun Saleziana ba Jezús nia Futar Fuan Santu iha 31 Dezembru 1899 no, iha okaziaun ne’ebá, haruka “lia-menon” kona-ba devosaun ne’e. Padre Michele Rua evidensia ninia importánsia ho modu partikulár ba uma sira formasaun nian, no husu atu novisiadu sira dedika ba Jezús nia Futar Fuan Santu. Loron ruma molok padre Rua mate nia husu padre Francesco Cerruti atu hakerek orasaun ba Jezús nia Futar Fuan Santu ba vokasaun sira. Nia aprezenta irasaun tuirmai ne’e, ne’ebé nia aprova, harohan no husu kópia ida atu tau iha nia sumasu okos: “Oh, Jezús nia Futar Fuan Santu, atu ita haruka serbisu-na’in di’ak no dignu ba Pia Sosiedade Saleziana no halo sira mantein fiél iha nia, Ami harohan, rona ami!”. [“O Cuore Sacratissimo di Gesù, affinché tu mandi buoni e degni operai alla Pia Società Salesiana e li mantenga fedeli in essa, Ti preghiamo, ascoltaci!” ].

FMA sira iha Regra n.27 dehan: “Devosaun ba Jezús nia Fuan, ne’ebé liga ho modu íntimu ba Mistériu eukarístiku no moris iha ita-nia tradisaun, tenke iha espresaun partikulár iha selebrasaun anuál novena nian no solenidade Jezús nia Futar Fuan Santu no iha komemorasaun sesta-feira dahuluk ida-idak fulan nian”.

Hanesan Madre Mazzarello hameno beibeik ba nia oan sira lemo rai nune’e: “Mai ita tama beibeik iha Jezús nia Futar Fuan, ha’u mós sei tama iha-ne’ebá, nune’e ita bele hasoru malu beibeik no dehan ba malu buat barak!” (Surat 17), mai ita haburas domin ba Jezús no domin ba maun-alin sira. Jezús mak halakon distánsia no muru hotu ne’ebé haketak ita, Jezús mak halo ita sai fuan ida de’it iha domin. Mai ita, loos duni, sai sasin kona-ba Jezús nia Fuan nakonu ho domin no husik Nia kontinua hadomi maluk hotu liuliu foin-sa’e sira liuhusi ita. Madre Mazzarello indika Jezús nia Futar Fuan  nu’udar fatin atu horik bá baibain nian. Ne’e mak konvite ida atu halo esperiénsia Maromak nia domin tanba koko tiha domin halo ita iha kapasidade atu hadomi.

Maromak ne’ebé hela iha fuan eduka ita ba diálogu ho ema seluk no kapasidade atu mantein relasaun iha kontradisaun sira no diversidade karakter nian: “Ita ko’alia ba malu iha Jezús nia fuan” (Surat 39), no distánsia jeográfika lakon tanba “loroloron ita besik malu iha Jezús nia fuan…” (Surat 42), sai fatin hasoru malu nian: “imi tama beibeik iha Jezús nia fuan, ha’u mós sei tama no ita bele hasoru malu beibeik no dehan ba malu buat barak” (Surat 17).

Hodi tama nafatin iha Jezús nia fuan, hodi hasoru Nia beibeik, ita bele halo ita-nia fuan hanesan Ninian. Liuliu ohin loron, iha ita-nia tempu ne’ebé foin-sa’e barak moris lahó futuru no família barak moris iha krize boot morál, kulturál, ekonómika no sosiál, esperiénsia kona-ba Maormak nia domin ne’ebé nakfilak sai anúnsiu esperansa nian iha tentasaun oioin ne’ebé babeur ema.