Dili – Semináriu kona-ba seksualidade ba novísia/u sira ohin, 5 Juñu, iha objetivu atu koñese an rasik, hatene no komprende di’ak liután kona-ba seksualidade hodi moris ho ekuilíbriu.

Semináriu ne’e irmán Alma Castagna FMA mak fasilita no patisipante sira mak novísia/u no relijioza juniora ruma, hamutuk na’in 40 husi kongregasaun oioin. Semináriu ne’e parte daruak, kontinuasaun husi semináriu anteriór hala’o tiha ona durante postulantadu.

Seksualidade mak parte fundamentál ema nia personalidade nian, sai modu partikulár atu moris, atu hatudu an, atu komunika ho ema seluk, atu sente, atu esprime no hala’o domin umanu. Iha ne’e irmán Alma foka dimensaun afetiva (emosaun), dimensaun rasionál (rona isin nia linguajen), dimensaun isik (isin nia hakaran).

Durante semináriu atensaun fó mós ba Kreda nia hanorin kona-ba relasaun seksuál, kona-ba omoseksualidade no prostituisaun, foti husi Maromak nia Liafuan no Majistériu nia hanorin.

Ikusnian, irmán ALma ko’alia kona-ba relasaun domin nian, nia foti ezemplu domin Kristu nian ba Kreda no fó karakterístika sira domin nian nu’udar totál ka lahó kondisaun (Jo 13,1); fiél ka metin nafatin (Mt 22, 20); fekundu ka fó fuan hodi fó moris (Jo 10,10).

Ba sira-ne’ebé hakarak saran an ba Maromak ne’e mak tenke sai sira-nia saran an ka domin nia karakterístika mós.